KOCAELÎ - 8 xwendekarên Zanîngeha Kocaeliyê piştî hatin girtin, îdianameya der barê wan de temam bû. Îdianameya xwendekaran bi skandalan hatiye dagirtin. Dozger hemû çalakiyên xwendekaran ên demokratîk û zagonî wekî sûc hesibandiye. Dozger şandina nameyan a girtîgehê jî sûc dît.
Di operasyonên siyasî de gelek siyasetmedar, nivîskar, parêzer, kedkar û xwendekarên muhalif hatin binçavkirin û girtin. Kesên ku hatin girtin û doz der barê wan de hat vekirini îdianameyên der barê wan de tên amadekirin, bi skandalan tije dikin. Xwendekarên Zanîngeha Kocaeliyê di 27'ê Gulanê de di serdegirtina malan de hatin binçavkirin û piştre hatin girtin, îdianameya der barê wan de hat amadekirin. Polîsan di serdegirtina malan de xwendekarên zanîngehê Berrîn Unsal, Burcu Guneş, Şîlan Taşar, Zana Yîgît, Îbrahîm Malkoç, Muhammet Yilmaz, Murat Ulgen û Ramazan Keskîn binçavkiribûn û piştî îfadeyê ew şandibûn girtîgehê. Dozger îdianameya der barê wan de amade kir û pêşkêşî dadgehê kir.
DOZGER ŞANDINA NAMEYAN SÛC DÎT
Xwendekarên ku hatin binçavkirin û birin Şaxa TEM'ê ya Derinceyê, 12 rojan li gel endamên DAÎŞ'ê di bin çavan de hatin girtin. Xwendekar di bin çavan de bi zext û tundiya "îtîraf bikin", "Em dê we poşman bikin" re rû bi rû man. Xwendekar piştî sewqî dadgehê hatin kirin, bi îdiaya 'Endamtiya rêxistinê hatin girtin.' Dozger der barê xwendekaran de îdianame amade kir. Dozger, çûyîna Komeleya Xwendekarên Azad a Amigrayê ya Kocaeliyê, komkujiya Roboskê bi bîr anîne, beşdarî Newroz û 8'ê Adarê bûne, girtina wekîlên HDP’ê şermezar kirine kuştina Farinaz Hosravanî ya li Îranê şermezar kirine û name ji girtiyan re şandine sûc hesiband. Dozger hemû çalakiyên demokratîk wekî "endamtiya rêxistinê" qebûl kir û xwest xwendekar bên ceza kirin. Dozger nameya xwendekar Berrîn Unsal a ji Girtîgeha Kandira re şandiye jî wekî "Moral û motîvasyon daye girtiyan" hesband. Dîsa xwendekarê ku bi telefonê lê geriya ye û gotiye “Mêrek li min digere û min bêzar dike. Tu dikare alîkariya min bike" û bersiva "Em dê hal bikin" wekî "Berpirsiyara Jinan a Kocaeliyê" hat hesibandin.
SÛCDARKIRIN PÊKENOK IN
Dozger der barê Burcu Guneş de jî bi sedema ku pismamê wê jiyana xwe ji dest daye û Zana Yîgît li Guneş geriya ye û gotiye "em pir xemgînin" bi gotina "Ji kuştina endamê rêxistina terorê re pir xemgîn bûne" şirove kir. Dîsa di pirsekê de gotiye tu eleqeya min bi PKK'ê re tune ye. wekî “Ji rêxistina PKK'ê bê agahdarkirin li dijî herikîna jiyana xwezayî ye." tawanbar kir. Dozger îdianame amade kir û pêşkêşi 5'emîn Dadgeha Cezayên Giran a Kocaeliyê kir. Doz dê di 16'ê Cotmehê de bê ditin.
MA / Meltem Oktay