Tifaqa AKP’ê û MHP’ê ya ji bo hilbijartinên 2019’an di qanûnên hilbijartinê de guhertin kirin û ji niha ve dest bi amadekariyên hilbijartinê kirine. Ji bo ewlehiya hilbijartinê gelê herêmê xistiye nav fikaran. Welatî diyar dikin ku hilbijartinek ewilî di bin şertên Rewşa Awarte (OHAL) û hemû şertên din de pêk bê dê baş derbas nebe û dê vîna wan neyê dîtin. Me wek Ajansa Mezopotamya ji bo rewşa tifaqa hilbijartinê û ewlehiya hilbijartinê berê xwe da ber Mizgefta Mezin a Sûra Amedê û me di vê mijarê de ji welatiyan pirs kir. Welatî gotin ku baweriya wan bi hilbijartinê nayê. 

 

‘GELÊ AMEDÊ TIFAQÊ ERÊNÎ NABÎNE’ 

 

Vedat Balci: “Ez ne bawerim ewlehiya hilbijartinê dê pêk were. Di hilbijartinan de hîle tên kirin. Herî dawî di referandûma 16’ê nîsanê de jî diyar bû ku çawa hîleyan kirin. Di sindoqan de ‘Na’ derketibû. Lê lîjneya hilbijartinê ‘Erê’ derxist. Tifaqa AKP-MHP’ê ne ji bo xêra gelê Amedê ye. Gelê Amedê teqez vê tifaqê erênî nabîne.” 

 

Hasan Sigin: “Baweriya min bi hilbijartinên li Tirkiyeyê pêk tên nayê. Baweriya me bi tifaqa AKP-MHP’ê nayê û em erênî nabînin.” 

 

‘AMED DENG DÊ DENG NEDE TIFAQA AKP-MHP’ 

 

Azîz Alkan: “Baweriya me bi hilbijartina dê AKP-MHP pêk bîne nayê. Tifaqa wan li ser berwendiyê ye. Dibe ku hinek deng bidin wan, lê dê gelê Amedê deng nede vê tifaqa wan. Heke ku zext û zilma OHAL’ê rakin, ev tifaq nikare wekîlekê hilbijêre. Îdiaya AKP’ê ya dê pirsgirêka kurd çareser bike, li ser kaxizan ma. Niha jî li Amedê cuda û li bajarên Anatoliyê cuda diaxive. Gel vê dibîne û dê dersa wan bide.” 

 

Lale Vural: “Têkildarî ewlehiya hilbijartinê xetereyên me kûr hene. Her car ewlehiya hilbijartinê tê nîqaşkirin. Encam her tim ji bendewariyê cudatir derdikeve. Bi taybetî li herêmê hin şaibe pêk hatin. Heke ku ev hebin, em ê çawa hilbijartinê bifikirin.” 

 

Şevket Yakin: “Ez difikirim ku wê hilbijartin baş derbas nebin. Nêrîna her kesî ya siyasî cuda ye, lê tifaqa AKP-MHP’ê ji bo me û Amedê ne baş e.” 

 

‘EWLEHIYA SINDOQAN NÎNE’ 

 

Alî Olak: “Li Tirkiyeyê ewlehiya sindoqên hilbijartinê nîne. Ez dengê xwe didim CHP’ê. Lê CHP peywîra dikeve ser milê xwe pêk nayne. Gelê Amedê bi awayekî baş li tifaqa AKP’ê û MHP’ê nanêre.” 

 

‘HETA ERDOGAN HEBE DÊ ÇAWA EWLEHÎ HEBE’ 

 

Sedat Uyar: “Ewlehiya hilbijartinê nîne. Li welatek ku Erdogan Serokomar be, dê çawa ewlehiya hilbijartinê hebe. Di hilbijartinê de deng tên dizîkirin. Erdogan karê hilbijartinê baş dizane. Herî kêm ji sedî 50 deng tên dizîkirin.” 

 

Yucel Akgunduz: “Qet û qet baweriya me bi hilbijartinek di bin van şertan de bikin nayê. Herî dawî di hilbijartina referandûmê de de jî derket holê. Ji Stenbolê ‘Na’ derketin viya şewqa Tirkiyeyê ye. Tifaqa AKP-MHP xwezayî ne. Jixwe xwediyê heman bîrdoziyê ne. Her tim bi hev re bûn. Li gorî berjwendiyên xwe helwestê digirin. Di bin van şertan de hilbijartina pêk bê, dê dîsa heman partî derbikevin.” 

 

Yusuf Hakan: “Ez li hember kamerayê nikarim biaxivim. Mirov nikarin biaxivin. Heke ku ez ramanên xwe bînim ziman, dê ji bom in pirsgirêkan derbixin.” 

 

Ebru Akşen: “Ji sedî sed ez ne bawerim ewlehiya sindoqan heye. Di dema deng jimartinê de neheqî heye.” 

 

Kader Açil: “Di hilbijartinên li Tirkiyeyê de deng tên dizîkirin. Ewlehiya hilbijartinê nîne.” 

 

MA / Cîhan Olmez – Devran Toptaş