STENBOL- Serokê Komîteya Amadekar a Newroza Stenbolê Alî Riza Bîlgîlî pîrozbahiya Newroza Stenbolê nirxand û got: "Newroza 2018'an, li Stenbolê gihaşt aramnca xwe. Nemaze jî gel bi awayekî zelal tewra xwe ya li hemberî polîtîkayên şerî yên li herêmê tên meşandin nîşan da."
Di Newroza Stenbolê ya li Qada Bazara Gel a Bakirkoyê hat pîrozkirin de, zêdeyî sedhezar kes tev li prîozbahiyê bûn. Welatiyan di Newrozê de bal kişandin ser polîtîkayên dagirkeriyê yên li Efrînê têm meşandin û tecrîda giran a li ser Rêberê PKK'ê Abdûllah Ocalan tê meşandin. Serokê Komîteya Amadekar a Newroza Stenbolê Alî Riza Bîlgîlî, Parlementera HDP'ê Leyla Bîrlîk û Hevberdevka HDK'ê Gulîstan Koçyîgît Newroza Stenbolê nirxandin.
Serokê Komîteya Amadekar a Newroza Stenbolê Alî Riza Bîlgîlî, destnîşan kir ku girseyeke ku zêdeyî xebatên wan tev li pîrozbahiya Newrozê bûye û got: "Wekî her carê, ev car jî gel hesasiyeta xwe nîşan da û qad tije kirin. Li kuderê dibe bila bibe, gelê me baş dizane ku dê çi peyamê bide û di vê çarçoveyê de îro jî peyamên xurt dan. Newroza 2018'an, li Stenbolê gihaşt armanca xwe. Nemaze jî gel bi awayekî zelal tewra xwe ya li hemberî polîtîkayên şerî yên li herêmê tên meşandin nîşan da. Gelek hêzên çepgir, sosyalîst destek dan. Em ê bi vî ruhî 1'ê Gulanê bi rêxistin bikin."
Her wiha Bîlgîlî destnîşan kir ku gel der barê rewşa Efrînê û tecrîda li ser Rêberê PKK'ê Abdûllah Ocalan de jî bi awayekî zelal peyam da.
BÎRLÎK: HER ÇAR PERÇÊ KURDISTANÊ BÛN YEK DIL
Parlementera HDP'ê ya Şirnexê Leyla Bîrlîk jî got: "Peyama herî girîng a Newroza îsal yekparebûna bi gelê Efrînê re û ruhê berxwedana Efrînê bû. Îro her çar perçeyên Kurdistanê bûn yek dil. Ev yek zaf girîng bû. Gelên Tirkiyeyê û gelê Kurdistanê ji vê pergala dîkta re got: 'Em li vir in. Em ê destûrê nedin çewisandin, zilmê û şer.'"
KOÇYÎGÎT: BI MILYONAN KAWA QAD TIJÎKIRIN
Hevberdevka Kongreya Demokratîk a Gelan (HDK) Gulîstan Koçyîgît jî, malavayiya gelê ku qad tije kirin kir û got: "Newroza 2018'an ev yek nîşanî me da; bi milyonan kurdên ku xwedî li nasname, dîrok, çand û rûmeta xwe derdikevin hene û bi milyonan dostên wan hene. Heta ku Newroz hebin wê ev têkoşîn jî hebe. Îro li hemû qadên Newrozê peyameke hêzdar ji bo kesên peykerên Kawayê Hesinkar rûxandin hat dayîn. Bi rûxandina peykaran ev têkoşîn naqede. Bi milyonan Kawa qad tijî kirin û stranên azadiyê gotin. Bila ev yek jî ji wan re bibe derd."