STENBOL - Ciwanên enternasyonalîst ên li Almanyayê beşdarî meşa ji bo azadiya fîzîkî ya Rêberê PKK’ê Abdullah Ocalan bûn gotin: "Êdî dem dema azadiyê ye. Ji niha û pê ve divê em ji xeynî azadiyê tu tiştî qebûl nekin."

 

Ji Rêberê PKK'ê Abdullah Ocalan ê 23 sal in di şert û mercên giran ên tecrîdê de li Girtîgeha Îmralî ya Tîpa F'yê tê girtin, 18 meh in tu xeber nayên girtin. Herî dawî di 25'ê Adara 2021'an de bi rêya telefonê hevdîtin bi Abdullah Ocalan re hatibû kirin. Serlêdanên malbatê û yên parêzeran ên ji bo hevdîtinê an nayên bersivandin an jî bi hinceta cezayên "dîsîplînê" tên redkirin. 

 

Li gelek bajarên Ewropayê ji bo azadiya fîzîkî ya Abdullah Ocalan çalakiyên cur bi cur tên lidarxistin. Ciwanên enternasyonalîst û kurd, di 11'ê Îlonê de li bajarê Essen ê Almanyayê bi dirûşmeya "Ji bo azadiya Rêber Apo: Tevlî Têkoşîna Azadiyê bibin" meşek dabûn destpêkirin. Meş ku dê şeş rojan bidome dê di 16'ê Îlonê de li bajarê Aechenê bi dawî be. Ji Elmanya, Înîltere, Fransa, Swîsre, Kolombiya, Awustralya, Îtalya, Spanya û Hollandayê gelek ciwan tevlî meşê bûne. 

 

Muharrem Aral (65) ku di Komîteya Amadekar a meşê de ye û ciwanên enternasyonalîst ên beşdarî meşê bûne, bal kişandin ser girîngiya azadiya Abdullah Ocalan. 

 

BANDOR JI ABDULLAH OCALAN GIRT

 

Muharrem Aral ê di Komîteya Amadekar de cih digire diyar kir ku gava xwendekarê zanîngehê bûye ji ber xebatên siyasî doz lê hatiye vekirin û ji ber vê ji Tirkiyeyê berê xwe daye Ewropayê. Aral destnîşan kir ku wî di navbera 1983, 1985 û 1996'an de fikirên Abdullah Ocalan nas kiriye û firsenda hevdîtina bi Ocalan bi dest wî ketiye. Aral, destnîşan kir ku piştî ku wî Abdullah Ocalan nas kiriye, Ocalan bandoreke mezin lê kiriye û wiha got: “Rêbertiyê (Ocalan) bandorek mezin li min kir. Di warê derûnî, giyanî de, bi kurtasî, bi her awayî bandor li min kir. Rêbertî bi xwe jiyaneke bi rûmet e, nûnertiya wê dike. Min pir tesîr ji rêbertî û jiyana wî girt û hê jî digirim. Lewma girtin û esareta rêbertiyê pir bandor li min kir." 

 

Aral bal kişand ser girîngiya meşa dirêj a ji bo azadiya fizîkî ya Abdullah Ocalanû got ku Abdullah Ocalan di vê qonaxê de tenê ne ji bo gelê kurd, ji bo gelên cîhanê jî paradîgmayên fikrî hilberandiye. Aral anî ziman ku lewma ew Abdullah Ocalan wekî şexsekî nabînin û wiha got: “Em dikarin bibêjin ku paradîgmaya ku rêbertiya me (Abdullah Ocalan) pêş xistiye, tenê gelê me eleqedar nake. Rizgariya hemû mirovahiya berpêş dike. Mirovên di pergala kapîtalîst de, bi gelek pirsgirêkan re rû bi rû ne; Lîberalîzm heye, takekesîtî heye, ji ciakîbûnê qutbûn heye, neçareseriyeke mezin heye. Lewma girse û ciwanên Ewropayê hewl didin ku paradîgmaya rêbertiya me li ser bingeheke rast fêm bikin. Di heman demê de ev ciwanên enternasyonalîst, rola jinê ya di Şoreşa Rojavayê de dibînin û dizanin ku jiyana birûmet bi yekparebûna bi vê têkoşînê re pêkan e û bi bîr û bawerî beşdar dibin. Piraniay beşdarên vê mela me dostên enternasyonalîst in."

 

Arar bilêv kir ku Abdullah Ocalan ê dijberê pergala kapîtalîst bi her awayî tê tecrîdkirin û wiha dewam kir: “Tecrîdkirina rêbertî tiştekî siyasî ye. Lê belê qada navneteweyî ji bo vê tiştekî nake. Di esasê xwe de ev yek ji aliyê ciwanan ve tê dîtin û lewma li her derî hewl didin ku bi rêbertiyê re bibin yek û rêbertiyê fêm bikin. Ji ber vê gelek dostên enternasyonalîst di çalakiyên ji bo azadiya rêbertiyê de cih digirin. Peydakirina rayeke giştî girîng e. Dema tu ne çalak bî û bêbertek bî dê tu tişt zelal nebe. Û çawa di pêkanîna armanca xwe we de tu yê hem pasîf bî hem jî tu yê ji bo rêbertiyê encamekê bi dest nexî. Lê dema ku girse bi meşên wisa dirêj bertekên bertek nîşan didin, hesasiyeta mirov pêş dikeve. Û dostên me ji dil û can doza azadiya rêbertî dikin. Ji bo vê jî çi hewce be tê kirin."

 

BI ŞOREŞA ROJAVAYÊ ABDULLAH OCALAN NAS KIRIYE

 

Ji ciwanên enternasyonalîst ên Kolombiyayê Camîlîo Torres ku beşdarî meşê bû anî ziman bi Şoreşa Rojavayê re fikrê Abdullah Ocalan li hemû cîhanê belav bûye. Torres da zanîn ku wî bi vê şoreşê Abdullah Ocalan û tevgera kurd nas kiriye. Torres diyar kir ku hemû cîhan Şoreşa Rojavayê dişopîne û wiha got: "Di vê pêvajoyê de li her derê fikr û felsefeya Abdullah Ocalan hat nîqaşkirin. Her ku min di nîqaş û rexneyên li ser Ocalan de fikir û analîzên rêbertiyê dîtin, têkoşînê hîn zêdetir bala min kişand. Çendî ez kolombiyayî bim û dûrî Kurdistanê bim jî, min xwest bi van meşan vê mesafeyê ji holê rakim. Çawa ku gelên cîhanê ji bo parastina Kurdistanê fedekarî kirin û şehîd ketin, niha jî bi hev re li dijî zilma dijmin têdikoşin."

 

‘KURDISTAN NAVENDA HÊVIYÊ YE'

 

Torres destnîşan kir ku şerê Tirkiyeyê yê li Rojhilata Navîn bi hêzên hegemonîk ên wekî DYA û Rûsyayê re ji bo mirovahiyê karesat e û wiha got: “Em gelên cîhanê û gelên azadîxwaz dibêjin ku em ê nehêlin ku ew Kurdistanê wêran bikin. Berovajî, Kurdistan şoreşa dilê me ye û navenda hêviyê ye. Kurdistan, cihê têkoşîna şoreşgerî ya Rojhilata Navîn e û ev dê li cîhanê belav bibe. Em ji bo parastina vê amade ne. Çawa hevalên me li Zap, Avaşîn û Metîna li ber xwe didin, em jî li ku dibin bila bibim em amade ne ku li ber xwe bidin. Em ê vê têkoşînê bimeşînin û em ê di rêya şehîdên xwe û rêbertiya xwe de bimeşin."

 

‘JI BANDORA OCALAN DITIRSIN'

 

Torres anî ziman ku gelek rêberên şoreşger ên ku di dîrokê de doza azadiyê kirine, bi fikir û helwestên xwe yên pêşverû bandor li mîlyonan kirine û ji bo Abdullah got ky "Yekûna azmûneyên şoreşgerî yên di dîrokê de ye." Torres axaftina xwe wiha domand: “Ocalan bi fikir û şêwaza xwe di sosyalîzm û azadiyê de israr dike. Hemû têkoşîn û şoreşên azadiyê yên kevin li cihekî li hev kom kir û veguherand yek doz, yek berxwedan û yek serkeftinê. Her sal, her roj tecrîdeke bi vî rengî ya giran li ser rêbertî tê ferzkirin, ji ber ku fikir û ramanên rêbertî, serkeftina wî ya li dijî kapîtalîzmê alternatîf e. Ji ber vê yekê hêzên hegemonîk ên li cîhanê naxwazin ew bê berdan û tew naxwazin xeberek wî jî bê bihîstin. Ew ditirsin ku dê bandorê li azadîxwazan bike. Lê em dizanin ku berxwedana gelan, gerîla û gelê me yê welatparêz, helwesta wan a li hemberî van êrişan rê dide ku rêbertî azad bibe, Kurdistan azad bibe û bibe xwedî statu.

 

DEM DEMA AZADIYÊ YE

 

Fikra modernîteya demokratîk ji bo gelên herêmê, Rojhilata Navîn û hemû cîhanê dibe model û alternatîf. Lewma em dizanin ku dîroka kapîtalîzmê diqede û em ji bo avakirina jiyana azad amade ne. Em ciwan bi vê meşê daxwaza azadiya rêbertî dikin. Em dixwazin doza me ji bo ciwanên enternasyon û ewropî, bi taybetî jî ji bo ciwanên kurd bibe mînak. Tenê ne beşdarîya meşê, divê her kes xwe di jiyana xwe de birêxistin bike û fêm bike ku niha dem dema azadiyê ye û ji niha û pê ve divê em ji bilî azadiyê tiştekî qebûl nekin.”

 

‘OCALAN RÊBERÊ GEL E'

 

Luîze Piyanî ya ku beşdarî meşê bû anî ziman ku heta niha ji bo Ocalan beşdarî sê meşên cuda bûye. Piyanî wiha got: “Bi taybetî di dema Şoreşa Rojavayê de têkiliya min çêbû. Li dibistanê ji bo gelê kurd pêşandaneke hat çêkirin. Ji bo Şoreşa Rojavayê min bo taybetî li ser dîroka PKK’ê, paradîgmaya rêbertiyê û bi heman awayî li ser nasnameya kurdî lêkolîn kirin. Ez Ocalan wek rêber dibînim. Gelek ciwan wekî min jî wî wiha dibînin. Bi dîtina min Ocalan bi bîrdozî û paradîgmaya xwe rêberê gel e. Lewma ez difikirim ku ger em bi hemû hêza xwe ji bo azadiya wî ya fîzîkî têbikoşin û piştgiriyê bidin van çalakiyan ew ê bigihêje azadiya xwe."

 

AZADIYA JINÊ BALA WÊ KIŞAND

 

Maksîm Fîçer bilêv kir ku atmosfera meşa ji bo Abdullah Ocalan hatiye çêkirin gelekî mezin e û got ku wî bi meşa biheybet a du sal berê ya gelê kurd û dostên wan, gelê kurd û Abdullah Ocalan nas kir. Fischer wiha got: “Yek ji tiştên ku herî zêde bala min kişand, rabûna Serok APO ya li dijî pergala kapîtalîst e. Bi rastî, ramanên nû derxistiye holê. Paradîgmaya wî li ser azadiya jinê û ekolojiyê ye. Ev yek pir zêde bala min kişand. Almanya di şerê li Kurdistanê de xwedî roleke mezin e. Almanya destekê dide dewleta tirkk û çekan dişîne. Ji ber vê yekê divê çalakiya azadiya Ocalan li vir bê lidarxistin."

 

BANGAWAZÎ

 

Rojbîn Şengal ku 5 sal berê tevî malbata xwe ji Şengalê reviya û ji ber şerê Sûriyeyê li Almanyayê bi cih bûye, axaftina xwe wiha domand: “Ji bo min cihgirtina di têkoşîna Rêber Apo û Kurdistanê de gelekî watedar e. Jiyana li Almanyayê, naşibe ya welatê min. Bi rastî jî karekî pir zehmet e, ez pir bêriya Kurdistanê dikim. Gava Kurdistan ava bibe ezê vegerim. Ji ber êrişên çeteyên DAIŞ'ê yên sala 2014'an ên li ser Şengalê, em neçar man terka warê xwe bikin. Hêviya min ew e ku jinên kurd di vê meşê de bi me re tevbigerin û vê têkoşînê bi me re bidin meşandin. Ciwanên kurd, jinên kurd, werin em hemû li hev xwedî derkevin. Divê em Ocalan bi tenê nehêlin.”

 

PARADÎGMAYA ABDULLAH OCALAN BERBELAV BÛ

 

Paula Hilde diyar kir ku wê bi Şoreşa Rojava gelê kurd û Abdullah Ocalan nas kiriye û got ku ew beşdarî hemû meşên ku bi vê armancê tên lidarxistin bûye. Hilde wiha got: “Paradîgmaya Ocalan bi qasî ku ji bo Tirkiye, Îran, Iraq, Sûriye û hemû cîhanê re bibe çare bihêz e. Ciwanên li çar aliyê cîhanê divê tevlî vê bangê, têkoşînê û meşê bibin. Divê em paradîgmaya Ocalan li hemû cîhanê belav bikin. Ji gelek cihan gelek ciwanên cuda tevlî meşa me bûn. Ne tenê ciwanên kurd û alman, ji gelek welatên cuda ciwan hene. Van salên dawî vê yekê nîşan dide: paradîgmaya Ocalan berbelav bûye. Ji bilî vê, ev bi rastî ji bo hemû ciwanan çareseriyek e. Ez dixwazim her kes li dora van rêgezan beşdarî van meşan bibe. Ocalan bi çareseriyên xwe cewhera jinê derxist holê. Ji ber vê yekê Ocalan ji bo me rêber e."