WAN – Di ser kuştina Zafer Ceyhan ku li Erdîşê taksiya wî hat gulebarankirin û mir de 6 meh derbas bûn, lê belê di dosyeyê de tu geşedan rû nedane. Kekê wî Nûrî Ceyhan got: “Birayê min ji taksiyê derxistine û kuştine û kifş e ku paşê taksî gulebaran kirine.”
Li Gundê Sûlû yê Erdîşa Wanê, di 28’ê Îlona 2017’an de wesayîtek hatibû gulebarandin. Ji 2 kesên di hundurê taksiyê de ajovan Zafer Ceyhan (45) miribû. Di ser bûyerê re 6 meh derbas bûn, lê belê hîn jî di dosyeya lêpirsînê de tu geşedan xwe nedane der. Nûrî Ceyhan , kekê Zafer Ceyhan, destnîşan kir ku birayê wî di hundurê taksiyê de nehatiye kuştin, li derve hatiye kuştin.
'KURÊ WÎ YÊ 5 SALÎ ÇAV LI RIYA BAVÊ XWE YE’
Kek Ceyhan, diyar kir ku piştî bûyerê polîsan taksî daye wan û ji bo debara malbata birayê xwe bike wê dixebitîne. Ceyhan destnîşan kir ku biraziyê wî yê 5 salî ji ber zêde bêriya bavê xwe dike tim digirî û got: “Em hemû hewl didin li malbatê binerin. Hema bêje 6 meh di ser bûyerê re derbas bûne, lê belê hîn jî em nehatine ser hişê xwe. Nemaze jî biraziyê min ê biçûk, kengî em zilamên malê tên gel hev baz dide tê cem me. Dema çav li bavê xwe nakeve digirî û diçe. Zarokên din hinekî baş bûne, lê yê biçûk tim çav li riya bavê xwe ye. Malbat li mala xwe jiyana xwe dewam dike. Em xwişk û bira çi madî çi manewî hewl didin kêmaniya birayê xwe nedin der. Polîs taksî radestî me kir. Min ew tamîr kir, niha wê dixebitînim.”
ŞÛNA GULEYAN NEGIRT
Kek Ceyhan bi lêv kir ku dema wan taksî girtiye, li pêşiya wê şûna du guleyan û li hêla dîreksîyon jî şûna guleyekê hebûye. Ceyhan diyar kir ku berkesê daxuyaniyê walîtiyê, di taksiyê de şopên pevçûnê nexuya bûne. Kek Ceyhan anî ziman ku birayê wî bi awayekî derhiqûqî hatiye kuştin û got: “Piştî min taksî tamîr kir, min tu tişt nekirin. Pevçûn filan û bêvan rû nedaye. Tenê şopa 3 guleyan lê heye. Me şûna wan guleyan jî negirt. Eger sibê disibe lêpirsîne bê kirin wê lazim be. Birayê min ji wê taksiyê derxistine û kuştine û kifş e ku paşê taksî hatiye gulebarankirin. Em dixwazin ev yek û neheqiya hatiye kirin bi riya darazê bê aşkerekirin. Kesekî sivîl û xwedî zarok hatiye kuştin. Ev mesele ne meseleyeke ku hin kes bixwazin û ser wê bigirin. Bi qasî em dişopînin lêpirsîna dozgeriyê didome, piştî lêpirsîna wan bi dawî bibe em ê dozê vebikin. A rastî nizanim wê dozgerî kuştina Zafer çawa esas bigire, lê em malbat em ê di warê darazê de bitêkoşin. Wekî malbat tekane daxwaza me ew e ku berpisiyarên birayê me bên dîtin.”
MA / Nimet Olmez