Li Girtîgeha Tîpa M a Ceyhana Edeneyê, girtiyên bi navê Nedîm Baysal, Omer Tolûk, Mazlûm Erdem, Mehmet Emîn Ado, Mehmet Taç û Bûrhan Çelîk ji bo dawî li çewisandin û binpêkirinên mafan bên ji 21’ê Sibatê ve di greva birçîbûnê ya bê dem û dorveger de ne. Her diçe rewşa girtiyan xirabtir dibe û bang li raya giştî kirin ku di vî warî de hesas bin û xwestin daxwazên wan bi cih bên. Abdûllah Baysal, kekê Nedîm Baysal ê di greva birçîbûnê de, got wî hefteya borî roja Pêncşemê bi birayê xwe re hevdîtin çê kiriye û her diçe rewşa wî xirabtir dibe. 

 

‘EM BÛN ŞAHIDÊN BINPÊKIRINÊN MAFAN’ 

 

Kek Baysal, destnîşan kir ku heta daxwazên wan bi cih neyên dê girtî çalakiya xwe berdewam bikin. Baysal diyar kir ku ew bi çavên xwe bûne şahidê binpêkirinên mafan û got: “Dema em ji bo hevdîtinê çûn, heta gorên me jî derxistin û em bi şimikan çûn hevdîtinê. Di lêgerînê de devê me jî vekirin û lê nêrîn. Dest datînin ser nameyan. Li ser vê yekê hefteya borî girtî ji bo hevdîtinê derneketin. Sepandinên wekî hijmariya li ser piyan, desteserkirina pirtûk, rojname û kovaran û her wekî din di dewrê de ne.” 

 

‘DEMILDEST HEYETEK DIVÊ’ 

 

Baysal destnîşan kir ku piştî greva birçîbûnê çewisandinên li ser girtiyan hîn zêdetir bûne û got: “Dema ketin greva birçîbûnê hefteya ewil hevdîtina bi telefonê qedexe kirin. Bi vî awayî nehiştin girtî bi malbatên xwe re pêwedniyê deynin. Di lêgerînên qawîşan de jî nêzî 15 gardiyan ketina qawîşê û jimariya li ser piyan li wan ferz kirine. Rewşa girtiyan nebaş bû û jihaldeketî bûn. Girtiyan xwest em biçin Komeleya Mafên Mirovan (ÎHD) serlêdanê pêk bînin û xwestin raya giştî di vî warî de bi hesas tev bigere. Em malbat dixwazin demildest heyetek biçe girtîgehê û rewşa girtiyan bibîne.” 

 

‘ZIHÎF DIBIN’ 

 

Nafiye Erdem, dayika girtiyê bi navê Mazlûm Erdem, jî bi lêv kir ku nêzî 2 salan e kurdê wê girtiye û berê jî li dijî çewisandinan 16 rojan di greva birçîbûnê de mabû. Dayik Erdem got: “Berê jî gardiyanan li kurê min xistibûn. Dema di hevdîtina vekirî de min ew dît, serçavê wî di nav xwîn de bû û mor bibû. Ji ber vê em çewisandinên li wê girtîgehê dizanin.” Erdem bi lêv kir ku ji ber ku kurê wê li dijî neheqî û zilmê ye ketiye greva birçîbûnê û got: “Kurê min û girtiyên din zihîf bûne. Hema bêje her yek ji wan 7-8 kîlo kêm kirine. Lê belê dîsa jî li ser xwe ne. Îdareya girtîgehê pêdiviyên girtiyên di greva birçîbûnê de bi cih nayîne. Dixwazim demildest ji bo girtiyên di greva birçîbûnê de tiştek bê kirin û herkes di vî warî de bi hesas tev bigere.”