STENBOL - Meclisa Ekolojiyê ya HDK’ê banga tevlibûna “Konferansa Avhewaya Gelan a Navnetewî” kir û diyar kir ku yên dibin sedema krîza ekolojîk dê ji bo gelan û xwezayê tu çareseriyê li pêş nexin.
Meclisa Ekolojiyê ya Kongreya Demokratîk a Gelan (HDK) dê di 3-5’ê hezîranê de “Konferansa Avhewaya Gelan a Navnetewî” dê li dar bixe. Meclisa Ekolojiyê beriya konferansê li Navenda Giştî ya HDK’ê civîna çapemeniyê li dar xist. Hevberdevkên HDK’ê Esengul Demîr û Cengîz Çîçek, endamên HDK’ê û rêveberên HDP’ê beşdarî civînê bûn.
JI BO AVHEWAYÊ Û GELAN ÇARESERÎ LI PÊŞ NAKEVE
Endamê Meclisa Ekolojiyê Cemîl Aksu diyar kir ku êdî vegera talankirina ekolojiyê nîne û encamên krîza avhewayê li tevahiya dinyayê wek şewatan û lehiyan tê dîtin. Aksu anî ziman ku pergala kapîtalîst ji bo çend dewlemendan behiştê ava kiriye û ji bo hemû cûreyên zindaweran qiyametê aniye. Aksu da zanîn ku hemû felaketên pêk tên di heman rêjeyê de tesîrê li ser her kesî nake û di encamên krîza avhewayê û talankirina ekolojiyê de newekhevî û bêedaletiya kurewî heye. Aksu destnîşan kir ku pergala kapîtalîst berjwendiyên kapîtalîst diparêze û yên dibin sedema krîza ekolojîk dê ji bo gelan û xwezayê tu çareseriyê li pêş nexin. Aksu got ew ê di 3-5’ê hezîranê de konferansa xwe li dar bixin û banga tevlibûnê kir.
GIRÎNGIYA TEVLIBÛNÊ
Hevberdevka HDK’ê Esengul Demîr jî diyar kir ku ew kêfxweş in vê konferansê radigihînin û konferansa dê li dar bixin girîng e û ew her kesî vedixwînin konferansa xwe.
HDP PIŞTEVANIYÊ DIDE KONFERANSÊ
Endamê MYK’a HDP’ê Nacî Sonmez jî anî ziman ku konferansa dê bê lidarxistin girîng e û ew wek HDP’ê vê xebatê wek xebata xwe dibînin û xwedî lê derdikevin û banga tevlibûna konferansê kir.