Di 26’ê Mijdarê de li welatê Efrîqaya Rojava Gine Bissauyê derbeya leşkerî hate kirin. Piştî dereyê, hikûmeta veguhêz a ji 22 endaman pêk tê hate avakirin. General Horta N'Tam rojek piştî derbeyê weke “serokkomarê dema veguhêz” sond xwar. Serokkomarê nû, bi biryarnameyeke serokkomariyê ragihand ku hikûmeta veguhêz a ji 22 endaman pêk tê hatiye avakirin. Li gorî biryarnameyê, ji bilî 3 kesan, endamên din sivîl in û 5 endam jî jin in. 

 

Piraniya qebîneyê ji kesayetên nêzî Serokkomar Umaro Sissoco Embalo yê ji desthilatê hatiye xistin pêk tê. Carlos Pinto Pereira ku di dema hikûmeta din de Wezîrê Karên Derve bû, li Wezareta Edalet û Mafên Mirovan hate erkdarkirin. Wezîrê Karûbarên Cemaweriyê, Xanî û Plankirina Bajar Jose Carlos Esteves û Sekretetera Dewletê ya Karûbarên Navneteweyî û Civakan Fatumata Jau jî peywirên wan neguherîn. Biraziyê Serokkomarê berê Nino Vieira (di sala 2009’an de rastî sûîqestê hatibû), Joao Bernardo Vieira weke Wezîrê Karên Derve hate erkdarkirin ku ev geşedana herî balkêş bû. Vieira, di hilbijartinên serokkomarê yên 23’yê Mijdarê de weke namzetê serbixwe tev li hilbijartinan bûbû. Ilidio Vieira Te ku di hikûmeta berê de weke Wezîrê Fînansê dixebitî û kampanyaya hilbijartinê ya Embalo dimeşand jî weke Serokwezîr û Wezîrê Darayî hate tayînkirin. 

 

Konseya Aştî û Ewlekariyê ya Yekitiya Efrîqayê (AfB), bi daxuyaniyekê derbeya leşkerî bi tundî şermezar kir û ragihand ku heta pergala destûra bingehîn careke din dikeve meriyetê wan endamtiya Gine Bissauyê daye sekinandin.