Hate diyarkirin ku Platforma Saziyên Demokratîk di 27’emîn salvegera Komploya Navneteweyî ya li ser Rêberê Gelê Kurd Abdullah Ocalan dê di 15’ê Sibatê de li gelek bajarên Kurdistan û Tirkiyeyê çalakiyên meşê li dar bixin. Li Mersînê bi pêşengiya Platforma Saziyên Demokratîk a Mersînê dê roja Yekşemê li navçeya Akdenîzê saet di 18.00’an de li Parka Barişê meşê bê lidarxistin. Platformê ji bo azadiya fîzîkî ya Rêberê Gelê Kurd Abdullah Ocalan, piştgiriya Rojava û xwedîderketina pêvajoya aştiyê banga tevlibûnê kir. 

 

DIVÊ TECRÎD BI DAWÎ BIBE

 

Hevserokê Komeleya Piştevaniya Malbatên Girtî û Hikumxwaran a Çukurovayê (Çukurova TUHAY-DER) Mahsûn Geçer, diyar kir ku ew her kesî vedixwînin meşa 15’ê Sibatê û ev tişt got: “Ji bo bi dawîkirina tecrîda 27 salan a li dijî rêzdar Ocalan û teşhîra erişên li ser Rojava divê em li qadan bin. Ev meş, dê giringiya aştiyê nîşan bide.”

 

 ‘JI BO PIŞTGIRIYA GELÊ ROJAVA BEŞDARÎ GIRÎNG E’

 

Hevseroka Partiya Wekhevî û Demokrasiyê ya Gelan (DEM Partî) a Mersînê Bedriye Kuşê diyar ku Abdullah Ocalan di sala 1999’an de bi komploya navneteweyî anîne Tirkiyeyê û bibîr xist ku li Girtîgeha Îmraliyê di bin tecrîdê de yê û ev tişt got: “Di salvegra 27’emîn a koployê de li Rojava gelê me bi êrişên HTŞ û DAIŞ’ê rû bir û ma. Ev êriş berdewama komploya 15’ê Sibatê ye. Ji bo bidawîkirina tecrîdê û piştigiriya gelê me yê li Rojava em bangî her kesê dikin ku tev li meşê bibin.”

 

‘AŞTÎ BI RÊBERTIYÊ PÊKAN E’

 

Endama Meclisa Dayikên Aştiyê Adîle Bakrak wiha axivî: “Ji bo aştî, xwişk û biratiyê û bi dawîbûna mirinan ev meş girîng e. Ev 27 sal in Rêberê me ji bo gelên Kurd û Tirk piraya aştiyê ava kir. Em xwedî li Rêberê xwe derkevin; ew heta azad nebe aştî ne pêkan e. Ji ber vê yekê divê roja Yekşemê her kes li qadan be.”