Sagkan: Ji bo avakirina aştiyê divê serweriya hiqûqê bê avakirin  

2025-11-29 10:03:58


	AMED -Seroka Yekîtiya Baroyên Tirkiyeyê (TBB) Erinç Sagkan ku beşdarî bîranîna Tahir Elçî bû, ji bo zelakirina cinayeta Elçî daxwaza lêpirsînê kir. Birayê Elçi, Ahmet Elçî jî got: "Werin em aştiyeke birûmet diyarî Tahir bikin."

	 

	Ji bo 10'emîn salvegera kuştina Serokê Baroya Amedê Tahir Elçî, ji avahiya dadgehê heta Minareya Çar Ling a ku Elçî lê jiyana xwe ji dest da meşek hat lidarxistin û piştre li ser gora wî merasîmeke bîranînê hat lidarxistin. Seroka Yekîtiya Baroyên Tirkiyeyê (TBB) Erinç Sagkan, Serokê Baroya Wanê Sinan Ozaraz, Serokê Baroya Sêrtê Muhammed Alptekin û birayê mezin ê Elçi, Ahmet Elçî, beşdarî merasîmê bûn, li ser têkoşîna Tahir Elçi axivîn.

	 

	SAGKAN: DIVÊ CINAYETA ELÇÎ BÊ RONÎKIRIN

	 

	Sagkan destnîşan kir ku Elçî yek ji çalakvanên pêşeng ên pêvajoya aştiyê bûye û got: "Eger ew sax bûya, ez bawer im ku wî dê tevkariyên girîng di pêvajoya berdewam de bikira. Lêbelê, ji bo ku pêvajoyên aştiya civakî yên wiha li ser bingeha razîbûna raya giştî bin û ji hêla raya giştî ve werin hembêz kirin, divê pêşî lêpirsîn û dozên bi bandor ên der barê kuştinên nediyar de pêk bên. Wekî heval, malbat, hevrê û hevkarên wî, bendewariya me, berî her tiştî, ew e ku kuştina Tahir Elçî bi awayekî were ronîkirin ku di çavê raya giştî de cîh ji gumanan re nehêlin. Gavên ber bi aştiyê tenê bi vî rengî dikarin werin avêtin. Hêvîkirina ku civak bi veşartina kuştinên wisa nediyar û xwe wekî ku ew çênebûne hevdu hembêz bikin, ne rast e."

	 

	Sagkan der barê pêvajoyê de got: "Ger em îro li Tirkiyeyê li ser pêvajoyek aştiyê nîqaş dikin, divê bingeha wê li ser mafên mirovan, demokrasiyê, serweriya hiqûqê û serxwebûna dadweriyê be. Ez bawer dikim ku gava yekem a ber bi pêkanîna pêvajoya aştiyê ve avakirina serweriya hiqûqê ye. Ez bawer im ku ger Tahir Elçi îro sax bûya, ew ê avakirina serweriya hiqûqê û rêzgirtina ji bo demokrasiyê li pêş her tiştî bigirta. Pêvajoyeke aştiyê ya wisa tenê bi vî rengî dikare bi rastî were pêşvexistin. Ger Tahir Elçi sax bûya, ez bawer im ku ew ê îro jî zimanekî wiha bi kar bianiya." 

	 

	OZARAZ: EM AŞTIYÊ DIYARÎ ELÇÎ BIKIN

	 

	Serokê Baroya Wanê Sînan Ozaraz ku daxwaza avakirina aştiyeke birûmet kir got ku divê aştî diyarî Elçî bê kirin û got: "Pêvajoya aştiyê ya ku îro li Tirkiyeyê tê nîqaşkirin careke din pêvajoyek e ku Tahir Elçî hêvî dike û dixwaze. Ev ne tenê daxwaza Tahir Elçî ye, lê hêvî û daxwaza hemû gelên li vê herêmê ne. Em hêvî dikin ku rêya aştiyê ya ku îro hatiye destpêkirin dê ber bi pêşerojekê ve biçe ku em, Kurd, Tirk û hemû gel û baweriyên ku li Rojhilata Navîn dijîn, hemû dikarin bi nasnameyên xwe yên li ser bingeha hemwelatîbûna wekhev bijîn." 

	 

	ALPTEKÎN: DIVÊ EM MÎRATEYA WÎ BIDOMÎNIN

	 

	Serokê Baroya Sêrtê Muhammet Alptekin diyar kir ku Tahir Elçî ji bo aştiyê berxwedaneke mezin nîşan daye û got: "Di vê rêçê de, tew ji bo vî bajarî canê xwe da. Ji ber vê yekê, divê em vê pêvajoyê bi girtina berpirsiyariya berdewamkirina mîrateya wî bidomînin. Erka me ye ku em mirateya wî bidomînin."

	 

	AHMET ELÇÎ: EM AŞTIYEKE BIRÛMET DIYARÎ WÎ BIKIN

	 

	Birayê mezin ê Tahir Elçî, Ahmet Elçî jî diyar kir ku birayê wî ji bo avakirina aştiyê têkoşiyaye û got: "Wî di bernameyekê de parastina Kurdan kir. Ger ew di vê pêvajoyê de bijîya, ew ê di pêş de bûya. Ji ber ku Tahir dê her tim di pêş de bûya; wêrekî û hêza wî dê her tim li eniyên pêş bûya. Baweriya me bi tevahî bi pêvajoyê nîne; dewlet aştiya ku em dixwazin naxwaze. Divê dewlet gavên samîmî bavêje. Werin em aştiyê hembêz bikin. Werin em aştiyek birûmet diyarî Tahir û kesên ku di têkoşîna aştiyê de jiyana xwe ji dest dane bikin."