Krîza aborî ya ku bi salan e ji ber polîtîkayên siyasî û aborî yên desthilatê didome, hêza kirînê ya welatiyan roj bi roj kêm dibe û bihayên xurekan jî zêde dibin. Yek ji warên ku herî zêde ji krîzê bandor bûye, xwedîkirina heywanan e. Her çend bihayên şîr û berhemên şîr her tim zêde dibin jî, bihayên goşt li gorî sala borî bi qasî ji sedî sed zêde bûne. Li qesabxaneyan, bihayê goştê sor ku par di navbera 400-500 TL'yî de dihat firotin, niha di navbera 700-800 TL'yî de tê firotin. Bihayê goştê bihestî ji 650 TL'yî dest pê dike. Bihayê giştê mirîşkan ku par di navbera 40 TL'yî de dihat firotin, niha di navbera 100-120 TL'yî de tê firotin. Qesabxane ku dibêjin krîz bûye sedema bilindbûna bihayan û kêmbûna hêza kirînê, diyar dikin ku ji ber firotina kêm ew dixisirin. 

 

'KRÎZA ABORÎ HÊZA KIRÎNÊ KÊM KIRIYE'

 

Qesab Murat Sayaran diyar kir ku welatî nikarin goşt bikirin û got: "Ji ber kêmbûna hêza kirînê firotina me pir kêm bûye. Li Tirkiyeyê ji ber krîza aborî bihayê goşt pir zêde bûye. Par me goştê sor bi 500 TL'yî difirot, niha em bi 700 TL'yî difiroşin û dema ku me par kîloya goştê mirîşkan bi 40 TL'yî difirot, niha em bi 100 TL'yî difiroşin. Ev biha ji bo welatiyan pir zêde ye. Ji ber vê yekê, firotina me ji sedî 50 kêm bûye. Dahata me têra lêçûnên me nake û em dixisirin." 

 

SEWALVANÎ KÊM BÛYE

 

Qesab Mehmet Tanriverdî diyar kir ku her çend par goştê sor bi bihayê 400-500 TL'yî dihat firotin, îsal di navbera 700-800 TL'yî de ye. Tanriverdî her wiha got ku berê welatî goştê sor bi gewde dikirîn, lê niha mehê carekê tên û nîv gewde dikirin. Tanriverdî got: "Li gorî berê firotin pir kêm bûye û hêza kirîna welatiyan kêm e. Ji ber krîza aborî, sewalvanî kêm bûye û biha jî zêde bûne. Mesref zêde ne û qezenc jî kêm bûye. Ger bihayê goşt li şûna 700 TL'yî serê kîloyê 400 TL bûya, welatî wê bikiriyana."