Ji serê sibê de li gelek bajarên Başûrê Kurdistanê gel daketin qadan û çalakî lidarxistin. Gel li Silêmanî, Helebçe, Seyîdsadiq, Ranya, Qeladiz, Sengeser, Derbendîxan, Kelar, Teqteq û Çemçemalê daketin qadan û ji ber ku xizmet nayê kirin, mûçe nayên dayîn û pirsgirêkên gendeliyê nayên çareserkirin daxwaza îstifayê li hikûmetê dikin.

 

HEWLÊR

 

Li navçeya Rewandizê yê Hewlêrê, Partiya Demokratîk a Kurdistanê (PDK) êrîşî gel kir. Hêzên asayîşê yên ser bi PDK'ê, bi quntaxê çekan êrîşî gel kirin. Ji ber êrîşa asayîşê gelek kes birîndar bûn, gelek kes jî hatin binçavkirin.

 

SILÊMANÎ

 

Gel, li bajarokê Pîremegrûn ê navçeya Dûkan a Silêmaniyê agir berda ofîsa PDK’ê. Gelê ku dixwaze hikumet îstifa bike, li gelek cihan bûn hedefa êrîşên hêzên asayîşê. Li Silêmaniyê jî, bi hezaran kes ji bo şermezarkirina pêkanînên hikûmetê daketin qadan, ji Serayê heta ber ofîsa PDK'ê ya li kolana Salimê meşiyan. Welatiyan dirûşmên "Êdî bese ji hikûmdariya 26 salan re" û "Bila hikûmet îstifa bike" berz kirin. 

 

Li navçeya Seyîdsadiq a Silêmaniyê jî, gel berê xwe da avahiyên PDK’ê û dan ber keviran. Li ber avahiya qeymeqamtiya Seyîdsadiqê, piştî ku çalakgeran kevir avêtin, tevlîhevî derket û hin welatî birîndar bûn.

 

GERMIYAN

 

Li navçeya Kelarê ya Germiyanê jî bi pêşengtiya mamoste û karmendan li Parka Leyla Qasim çalakî hat lidarxistin. 

 

ÊRÎŞ DIKIN

 

Li herêman çalakî hê jî didomin û hêzên ewlekariyê êrîşî girseyê dike û guleyan li wan direşîne. Hat ragihandin ku ji ber ku Asayîşa PDK’ê êrîşî çalakvanan dike, hin hemwelatî birîndar bûne.