Li Colemêrgê, bi salan e gundî zebze û fêkiyên li gundan şîn tên li qeraxên rêyan dezgehên xwe datînin û difiroşin. Berê ji ber ku fiyetê van fêkî û zebzeyan erzan bûn gelek kes dikirîn, lê niha ji ber krîza aborî fiyetên wan jî biha bûne. Par firingiyên bi lîreyekê dihatin firotin, niha bi 5 lîreyan tên firotin û hirmiyên bi lîre û nîvê dihatin firotin niha bi 4 lîreyan tên fiortin. 

 

Cebraîl Bozkûrt ku li gundê Rezanê dijî, anî ziman ku par bi zebze û fêkiyên ku li gundê xwe datanîn debara xwe dikirin lê belê îsal ji ber ziwabûnê û nexweşînan tiştek bi dest wan neketiye. Bozkûrt, diyar kir ku zebze û fêkiyên di dest wan de jî ji ber krîza aborî fiyetên wan biha bûye û got: "Em zebze û fêkiyên li gund datînin difiroşin. Li gundê me her tişt şîn tê. Tiştên em datînin paşê li ser dezgehên xwe yên li qeraxên rêyan datînin difiroşin. Li gor par îsal fiyet pir biha bûne. Par zebze û fêkî pir bûn. Lê belê îsal ji ber nexweşînan û ziwabûnê kêm in." 

 

‘JI BER XWEZAYÎ NE EM JI VIR DIKIRIN'

 

Lokman Akdogan jî, anî ziman ku kesên rêwî ji ber ev zebze û fêkî organîk in dikirin. Akdogan, diyar kir ku par wan firingiyên li ser rê dihatin firotin bi lîreyekê dikirî û got: "Lê niha ji ber krîza aborî em kîloya firingiyan bi 4-5 lîreyan dikirin. Krîza aborî tesîr li hemû qadên jiyanê kir. Lê dîsa jî ji ber ku pêdiviya me pê heye em dikirin. Her ku em diçin Wanê, em ji van dezgehên li ser rê zebze û fêkiyan dikirin. Çimkî ên li vira organîk in û bi tahm in. Ji ber ku berên li nav bajêr tên firotin bi piranî ên seraya ne, bê tahm in. Lê mixabin niha ev jî biha bûne." 

 

'FIYET BIHA NE' 

 

Mûstafa Tûganê ku ji bo fêkiyan zebze û fêkiyan bikire hat ser dezgehên li qeraxa rê, anî ziman ku ji ber zebze û fêkiyên li nav bajêr bi hormon in ew ên vira dikirin. Tûgan got: "Ên li vira ne bi hormon in, loma bitahm in. Sala par fiyet pir erzan bûn, lê ji ber krîza aborî îsal pir biha ne." 

 

MA / Hamza Gunduz