ÎZMÎR - Namzetê Oldar ê HDP’ê Ferzend Denîz, banga cemaetan ên ji bo di hilbijartinê de piştgiriyê bidin AKP’ê û Erdogan nirxand û got: “Erka cemaetan ew e ku banga edaletê li mirovan bikin.”
Di serî de Cemaeta Menzîl û gelek cemaetên din, ji bo piştgiriya Serokê Giştî yê AKP’ê Tayyîp Erdogan a di hilbijartina 24’ê Hezîranê de, daxuyanî dabûn. Namzetê Oldar ê Partiya Demokratîk a Gelan (HDP) a Îzmîrê Ferzend Denîz, bang û daxuyaniyên cemaetan ên ji bo piştgirî dayîna AKP û Erdogan, nirxandin.
Denîz, diyar kir ku yên dixwazin jiyana xwe li gorî ol sererast bikin, divê li gorî Qur’anê tevbigerin û wiha axivî: “Ji ber ku nabe ku mirov li gorî hest û nêrînên xwe yên takekesî ol îstîsmar bike. Xwedî di Qur’anê de dibêje ‘Ey mirovan, ji hemû ayetên Xweda re rêzê bigirin.’ Ger mirovek bêje ‘ez ji bo xwe Qur’anê esas dirkim’ wê demê divê hemû fermanên di Qur’anê de pêk bîne.”
‘ALIMÊN OLDAR DIVÊ JI BO EDALETÊ BANG LI MIROVAN BIKIN’
Denîz, anî ziman ku misilmantî aştî û baweriye û wiha got: “Divê alimên oldar ser siyasetê re bin û ji bo edalet û maf mangî mirovan bikin. Navê wê çi dibe bila bibe, li Tirkiyeyê şerek heye. Erka hemû alimên oldar ewe ku li dijî vî şerê bang aştî, maf û edaletê li mirovan bikin. Divê alim çavên xwe li partiyeke zilmkar negirin. Îro 16 salin desthilatdariya AKP’ê Tirkiye bi rêve dibe. Bi referansa ol heya roja îro hatin. Wê demê erka alimên oldar ewe ku vê rastiya AKP’ê derbixin holê.”
Denîz, di dawiya axaftina xwe de wiha got: “Esas erka cemaetan ewe ku şaşiyên rêvberên dewletê derbixin holê û wan hişyar bikin. Ne ku bibin hevkarên şaşî û kêmasiyên wan.”