STENBOL – Endama Grûp Yorûm Hêlîn Bolek a di rojiya mirinê de ye got: “Werin deng bidin dengê me.”
Endamên Grûp Yorûm li dijî cezakirin, zext û pêkûtiyên li ser xebat û hunera xwe çalakiya greva xwe ya birçîbûnê veguherandin rojiya mirinê. Îbrahîm Gokçek ê li Girtîgeha Sîlîvriyê di roja 199’emîn a greva birçîbûnê de çalakiya xwe veguherand rojiya mirinê. Çalakiya Gokçek a rojiya mirinê di roja 232’yemîn de ye. Endama Grûpê Hêlîn Bolek jî çalakiya greva birçîbûnê di roja 213’yemîn de veguherand rojiya mirinê û çalakiya wê ya rojiya mirinê di roja 229’emîn de ye.
Bolek piştî ji hefsê hat berdan çalakiya xwe li mala xwe ya li navçeya Sariyera Stenbolê li Mala Berxwedan didomîne. Bolek ji 75 kîloyan daketiye 45 kîloyan. Bolek ji ajansa me re axivî û dibêje “Ez ji berxwedana daxwazên xwe hêzê digirim.”
NEXWEŞÎN ZÊDE DIBIN
Bolek da zanîn ku ji ser gêşbûnê heta made li hev ketin, vereşîn û hesiyariya li hember roniyê û gelek nexweşîn pê re peyda bûne û ji ber nexweşînên xwe pirsgirêka xewê pê re peyda bûye.
‘DAXWAZ ME LI SER PÊYA DIGIRE’
Bolek da zanîn ku tişta wê li ser pêya digire biryarariya berxwedanê ye û ji ber daxwazên xwe dest bi çalakiyê kirine. Bolek got bila hemû zextên li ser wan û saziya wan Navenda Çanda Îdîlê werin rakirin û navê wan ji lîsteya “terorê” werin derxistin.
‘SERKEFTIN A ME YE’
Bolek anî ziman ku ew bi berxwedana xwe ji roja ewilî ve bi ser ketine û dê qet û qet radest nebin û di berxwedana xwe de israr bikin.
‘DENG BIDIN DENGÊ ME’
Bolek diyar kir ku ew dixwazin ji bo xwedî derketinê raya giştî çê bibe û her kes guh bide daxwazên wan û got: “Em bang li her kesî dikin ku deng bidin dengê me.”
MA / Nacî Kaya - Bariş Ceyhan