AMED - Sînan Başakê ku di sala 2017'an de tayînî Şaredariyê Licê hatibû kirin, di roja xwe ya dudoyan de bûrayê xwe Fatîh Salîhoglû girtibû li şaredariyê bi cih kiribû. Paşê di dema qeyûm Cûmalî Atîlla de jî li Şaredariya Bajarê Mezin a Amedê bi awayekî dijqanûnî kiribû midûrê nivîsgehê û piştî kadro wergirt tayînî Şaredariya Kagithaneyê hat kirin.
Dîwana Mûhasebatê, di rapora xwe ya derbarê Şaredariya Bajarê Mezin a Amedê ya di serdema qeyûm Cûmalî Atîlla de diyar kir ku bi awayekî dijqanûnî kesek tayînî midûriyeta nivîsgehê hatiye kirin. Di raporê de hatiye diyarkirin ku kesê hatiye tayînkirin F.S. ye û di 23'yê Tîrmeha 2018'an de bêyî ezmûn hatiye tayînkirin.
Derket holê ku kesê di raporê de bi navê F.S. hatiye kodkirin, Fatîh Salîhoglû ye. Tê gotin ku Salîoglû bûrayê qeyûm Sînan Başak ku di sala 2017'an de tayînî Şaredariya Licê hatibû kirin. Salîhoglû jî ji navçeya Of a Trabzonê ye.
Sînan Başak ku di 10'ê Sibata 2017'an de bû qeyûmê Şaredariya Licê, di 12'ê Sibatê de jî Salîhoglû li şaredariyê bi cih kiriye û paşê bêyî ezmûnekê di dema qeyûm Cûmalî Atîlla de li Şaredariya Bajarê Mezin a Amedê li midûriyeta nivîsgehê hatiye bicihkirin û paşê kadro wergirtiye.
Her wiha beriya hilbijartina herêmî ya 31'ê Adara 2019'an Salîoglû vê carê tayînî Şaredariya Kagitxane ya Stenbolê ya AKP'î hatiye kirin û hîn jî li wir karmend e.
Tê gotin ku Başak û Salîhoglû xizmên Wezîrê Karên Navxweyî Suleyman Soylû ne.