WAN - Serokê Şaxa ÎHD'a Wanê Mûrat Melet, destnîşan kir ku tecrîda li ser Rêberê PKK'ê Abdullah Ocalan, pirsgirêkên di warê demokrasî, aborî, civakî û çandî de kûrtir dikin û xwest rojek berî rojekê tecrîd bi dawî bibe.
Piştî greva birçîbûnê ya bi pêşengiya Hevseroka Kongreya Civaka Demokratîk (KCD) Leyla Guvenê ku bi hezaran girtî tev lê bûbûn, tecrîda li ser Rêberê PKK'ê Abdullah Ocalan hatibû rakirin. Parêzer piştî 8 salan meha Gulan; Hezîran, Tîrmeh û Tebaxê de bi giştî 5 caran çûbûn Îmraliyê û malbat jî 2 caran. Lê belê ji 7'ê Tebaxa 2019'an ve ne parêer û ne jî malbat nikarin biçin Girtîgeha Îmraliyê. Serokê Şaxa Komeleya Mafên Mirovan (ÎHD) a Wanê Mûrat Melet, destnîşan kir ku tecrîda li ser Ocalan pirsgirêkên li Tirkiyeyê kûrtir dike û xwest rojek berî rojekê tecrîd bi dawî bibe.
'SÛCEKÎ MEZIN E'
Melet, destnîşan kir ku tecrîd rêbazeke îşkenceyê ye û got, tecrîda li ser Ocalan sûcekî li hemberî mirovahiyê ye. Melet, bibîr xist ku bi tecrîdê mafên Ocalan hemû tên binpêkirin û got: "Tecrîd, îşkence bi xwe ye. Em parêzvanên mafên mirovan di her platformê de vê yekê tînin ziman. Li kuderê cîhanê dibe bila bibe, em tim tînin ziman ku li dijî tecrîdê ne û tecrîd sûceke li hemberî mirovahiyê. Mixabin Ocalan bi salan e tê tecrîdkirin. Bi ser de şert û merc jî tên girankirin. A rast bi van şert û mercan di serî de mafê jiyanê û bi giştî mafên Birêz Ocalan hemû tên binpêkirin. Wekî hemû girtiyan mafên qanûnî yên Birêz Ocalan hene. Ev maf mafine insanî ne. Em dibînin ku bi tecrîdê ev mafên wî tên binpêkirin. A rast îtiraza me ji bo vê ye".
‘DEMILDEST DIVÊ BI DAWÎ BIBE'
Melet, destnîşan kir ku bi tecrîkirina Ocalan re her diçe pirsgirêkên li Tirkiyeyê kûrtir dibin û got: "A rast em bawer nakin wê Tirkiye bi vê rêveberiyê bi vê ferasetê dewam bike. Mixabin her diçe baweriya me ya ji bo demokrasiya li Tirkiyeyê kêmtir dibe. Her diçe binpêkirinên mafan zêdetir dibin. Çareserkirina pirsgirêka kurd di heman wextê de çareserkirin gelek pirsgirêkên Tirkiyeyê ye jî. Li Tirkiyeyê çareserkirina pirsgirêka kurd çareserkirina pirsgirêka demokrasî, abor, civakî û çandî ye jî. Helbet ji bo ev tişt pêk bên divê tecrîda li ser Birêz Ocalan bi dawî bibe û cardin Birêz Ocalan wekî muxatab esas bê girtin. Her wiha divê demildest parêzer û malbat bi girtiyên din ên li Îmraliyê re jî hevdîtinê çê bikin. Yanî bi tecrîda li Îmraliyê re mirov nikare li Tirkiyeyê behsa demokrasiyê bike."
Melet, anî ziman ku ji bo çareserkirina pirsgirêkên li Tirkiyeyê demildest divê tecrîd bi dawî bibe û got: "A rast çareserkirina pirsgirêkên li Tirkiyeyê girêdayî pirsgirêka kurd e. Çareserkirina pirsgirêka kurd jî bi bidawîbûna tecrîda li ser Birêz Ocalan pêkan e".
Melet ji bo bidawîkirina tecrîdê gazî kir û got: "Em parêzvanên mafên mirovan, dixwazin ku ji bo demokrasiyê ji bo berbelavbûna çandeke demokratîk tecrîd bi dawî bibe. Banga me ji bo muxalefet û îqtîdara siyasî ew e ku rojek berî rojekê tecrîd bi dawî bibe".
MA / Cemîl Ûgûr