COLEMÊRG - Şêniyên gundê Mêrganê ku li sînorê Herêma Kurdistana Federe ye, bal kişandin ser wateya sînoran û gotin, ji xeynî yekîtiya neteweyî tu rê li ber wan nîn e.
Şêniyên gundê Mêrgan ê navçeya Çelê ya Colemêrgê ku nêzî sînorê Herêma Kurdistana Federe ye, bal kişandin ser sînorên sunî û wateya wan a ji bo kurdan û gotin, sînor kurdan ji hev dûr dixe û ji xeynî yekîtiya neteweyî tu rê li ber wan nîn e.
Omer Kiliç, anî ziman ku di sala 1988'an de 2 malbatên kurd ên ji ber dîktatoriya Seddam Husên reviyan û hatin Çelê, 4 mehan li mala wî mane û got, tu wateyeke sînoran tuneye. Kiliç, got: "Bawer bikin heger kurd destê xwe bidin destê hev du ne Amerîka ne jî Rûsya wê nikaribe bi wan. Lê mixabin em belawela ne. Loma yekîtî şert e."
'XIZMÊN ME LI WÎ ALIYÊ SÎNOR IN'
Kiliç, destnîşan kir ku tim û tim pêwendiya wan û xizmên wan ên li wî aliyê sînor bi hev du re heye û got: "Em tim diçûn gundê Bêdûh, Benavî, Mayê, Dêrişk, Şîmaîla û Serdeştê. Ev gund hemû li wî aliyê vî girî ne. Em hem xizmên hev in hem jî dostn hev in. Me bi hev re bazirganî jî dikir. Niha jî em di şîn û dawetan de bi ser hev du de diçin û tên. Zêdetirî 100 xizmên me li wir hene. Divê em bên cem hev du. Çimkî em bira ne. Gava yek ji me birçî bimîne, divê em pişta xwe nedinê. Ji xeynî mirov tu kes nikare ji bo xwe tiştekî bike. Inyada me ya ji bo hev wekî ekvirekî mezin e. Loma em di vî halî de ne. Divê em kaya berê li ber bê berba nekin. Dibe berê kêmasiyên me çê bûbûn. Cihê hêrs lê hebe tiştek pêk nayê. Divê em li ser asasên hiqûqa hezkirin û biratiyê bi destê hev du bigirin. Tu pirsgirêk û meseleya me bi kesî re tuneye. A divê bê kirin, ew e ku rêberên û pêşengên kurdan li çar perçeyan kurdan bînin gel hev. Divê kongreyên mezin çê bikin û gel serwext bikin. Emrê min bi şivantiyê derbas bûye. Heger tu rêya rast li be min bixî ez ê li pey te bêm. Em vî tştî dixwazin. Êdî em dixwazin yekîtiyek çê bibe. Bila partî û rûspiyên her çar perçeyan bên cem hev du û ji gelê xwe re bibin pêşeng. Ji xeynî vê em tiştekî din naxwazin."
‘WÊ ÇAR PERÇE BIBE YEK'
Suleyman Demîr ku bi salan pêşmergetî kir, diyar kir ku ji 3 parên gundê wan du par jê li Herêma Kurdistana Federe ye û got: "Piraniya gundiyên me li wî aliyî ne. Li vira ji 3 paran tenê parek maye. Niha jî em bi ser hev du de diçin û tên. Di şîn û şahiyan de em bi ser hev du de diçin. Hêviya me heye, wê çar perçeyên Kurdistanê bibin yek. Kî vî gelî bîne cem hev du û yekîtiyê çê bike Xwedê jê razî be. Wê duayê me ji bo wan be."
Esma Demîr jî anî ziman ku serdana xizmên xwe yên li Herêma Kurdistana Federe dikin û got: "Em dixwazin yekîtiya neteweyî pêk bê. Biner, ev sînor e. Li wir xalanê min, xizmên min hene. Xwîna me yek e. Ji ber ku niha sînor hatine qedexekirin em bi pasaportê diçin û tên. Divê eynê wekî berê be, di navbera me û xizmên me de sînor tune bin. Heger em bibin yek em ê bi ser bikevin."
MA / Hamza Gunduz