WAN - Şaxa ÎHD'ê ya Wanê, nameyên girtiyan ên têkildarî binpêkirina mafên girtiyên li Girtîgehên Wan, Erzirom û Rîzeyê bi civîna çapemeniyê parve kir. Girtiyan di nameyan de gotin: "Em di tecrîda fermî de ne."
Şaxa Komeleya Mafên Mirovan (ÎHD) ya Wanê, têkildarî binpêkirina mafên girtiyan ên li girtîgehan civîna çapemeniyê li dar xist. Di civîna çapemeniyê de endam û rêveberên Şaxa ÎHD'ê û Baroya Wanê jî di navde gelek kes amade bûn. Di civînê de pankarta "Bila girtiyên nexweş serbest bên berdan" vekirin. Beriya daxuyaniyê Serokê Şaxa ÎHD'ê ya Wanê Murat Melet, diyar kir ku li Tirkiye her diçe binpêkirina mafan qat bi qat zêde dibe û wiha got: "Em bang li rayedaran dikin ku êdî binpêkirina mafên mirovan li girtîgehan bi dawî bibe û em dixwazin şertên girtiyan bên başkirin. Piştre nameyên girtiyan xwendin.
'EM DI TECRÎDA FERMÎ DE NE'
Rêveberên ÎHD'ê piştre nameyên ku girtiyan şandine parve kirin. Şereffetîn Demîr ê li Girtîgeha Ewlehiya Bilind a Wanê girti ye, di nameya xwe de diyar kir ku mehê 3 caran her carê 40-45 deqîqeyan derdikevin sporê û wiha got: Ji xeyni vê yekê hemû mafê me yê sporê û çandê li me hatine qedewxekirin. Em di bin tecrîda fermî de dijîn. Hemû mafê me hatine bisînor kirin. Em di mijarekê de piştgiriya heqûqî dixwazin. Em kesên rastî cezayê muebeta giran hatine, em di hefdîtinên vekirî de her dem bi heman ziyaretvanan re hevdîtin dikin. Ziyaratvanên me yên ji rêyên dirêj tên, pir hindik in. Dema hevdîtinê tenê 45 deqîqe ye. Ev dema hatiye qetandin gava ku li 3 ziyaretvanan tê parvekirin ij bo her kesekî demek pir hindik dimîne. Êdî tu tama hevdîtinê namine. Em tenê silav didin hev û dema me bi dawî dibe."
'EM DI GIRTÎGEHÊ DE OHALÊ DIJÎN'
Evren Yildiz, Onur Yilmaz, Şeyhmus Bulbul, Îlhan Dayan jî li ser navê girtiyên Girtîgeha Tîpa T a Oltu ya Erziromê name şandin û wiha gotin: "Di sala 2018'an de di bin navê normalizisyonê dest ji OHAL’ê berdan. Lê mixabin em niha disa pêvajoya 2016'an dijîn. Hemû mafê me yên zagonî bi zanebûn û keyfî yek bi yek ji destê me tên derxistin. Bi taybetî mafê pirtûk, kovar, pirtûkên rêziman nadin me. Rojnameyên ku em ji derve dixwazin nadim me û hesreta me em rojnameyên dixwazin bixwînin. Nameyên bi Kurdî bi hinceta wergêr tune naden me. Her çend ji bo dermankirinê sewq derkevin jî bi nêzîkatiyên bîrdozî em nayên dermankirin. Di kişandina diranan û kişandina fîlman de jî destê girtiyan kelepçe dikin. Hemû mafê me yê sporê ji destê me hatiye derxistin.
Girtiyên Girtîgeha Kalkandere ya Rîzeyê jî anîn ziman ku gelek girtiyên nexweş hene.
Prz. Mehmet Karataş jî diyar kir ku der barê binpêkirina mafan ên li Girtîgehan Tîpa T a Wanê, Girtîgeha Ewlehiya Bilind a Wanê û Girtîgeha tîpa F a Wanê li ser daxwaza ÎHD'ê rapor amade kirine.