Şaxa Komeleya Mafê Mirovan (ÎHD) ya Edenê, rapora derbarê êrîşa nîjadperest a piştî îstîsmara zayendî ya zaroka 11 salî hat kirin, li dijî kargeh, mal û wesayîtên komberên Sûriyeyî pêk hat de amade kiribû, ji raya giştî re aşkere kir. Daxuyanî li avahiya komeleyê hat lidarxistin. Endamên HDP, HDK, Malagel, EMEP û gelek kes beşdarî daxuyaniyê bûn. Serokê Şaxa ÎHD’ê yê Edene Parêzer Îlhan Ongor rapor xwend. 

 

ÊRÎŞ Û GOTINÊN NIJATPEREST

 

Di raporê de tespîtên hatibûn kirin, wiha hatin rêz kirin: “Piştî îstîsmara zayendî, bi îdîaya kesekê Sûriyeyî kiriye, êrîşên nijatperestî li dijî kargek mal û wesayîtên koçberên Sûriyeyê yên li Taxên Mîrzaçelebî, Gulpinar, Meydan û Daglioglû pêk hatin. Di êrîşê de hewldana talanê dest pê kir û dirûşmeyên ‘bimirin Sûriyeyî,’ ‘Sûriyeyî bi qewirin’ û ‘em Sûriyeyiyan naxwazin’ hatin berzkirin. Weke ku di wêneyan de jî xuya dike, kargehên Sûriyeyiyan gelek zirar dîtine û kar di wan de nayê kirin. Koma êrîş kir, di heman demê de nivîsên ‘Tirk’ û ‘TC’ li ser dîwar û deriyên kargehên Sûriyeyiyên li kolana Maydan nivîsandin. Polîsan bi tu awayî mudaxileyî koma êrîş nekiriye û tenê gaza îsotê berdeya ku êrîşkar belav bibin. Li gorî agahiyan 162 dikan û 12 wesayîtan zirar dîtine.”   

 

Di raporê de ev tespît hatin kirin: 

 

“*Piraniya deriyên kargehên koçberên Sûriyeyê yên li Kolana Meydan a taxa Mîrzaçelebî hatine şikandin û amûrên wan hatine talankirin. 

 

*Li ser deriyên kargehan ‘Turk’ û ‘TC’ hatine nivîsandin. 

 

*Hemû kargeh hatin girtin. 

 

*Koma êrîşkar, ne ji welatiyên taxê, ji taxên cuda hatibûn wir. 

 

*Hêzên ewlekariyê, dereng mudaxileyî êrîşê dike û bergiriyên xurt nagire. 

 

*Li gorî şahidên ku nexwestin navê xwe bidin, hêzên ewlekariyê destûr dan komekê ku êrîş bikin.

 

*Beşek koçberên Sûriyeyî malên xwe terk kirin. 

 

*Derbarê bûyerê nêzî 25 kesan hatin binçavkirin.” 

 

'RASTIYÊ DERXIN HOLÊ’

 

Di raporê de hat destnîşan kirin ku êrîşên li dijî koçberên sûriyeyî dewam dikin û hat xwestin ku ewlehiya can û malên Sûriyeyiyan bên parastin.