AMED - Hevserokê MED-DER’ê Mehmet Esen nêzîkatiyên şarederiyên AKP’î yên piştî hilbijatina 31’ê Adarê yên li dijî zimanê Kurd nirxand û got: “Divê lewheyên hatin rakirin, tenê weke rakirina lewheyekê neyê dîtin, ev sedama hebûna gelê Kurde. Bi van pêkanînan çand, ziman, civak û dîroka gelê Kurd tune dihesibînin.”
Partiya Herêmên Demokratîk (DBP) di serdema şaredarî qezenc kirin de, lewheyên bi zimanê Kurdî û navên Kurdî bi şaredarî û parkan ve kirin. Piştî qeyûm tayînê şaredariyên DBP’ê hatin kirin, gelek navên Kurdî guhertin. Ev pêkanîna AKP’ê piştî hilbijartina 31’ê Adarê jî berdewam kir. Serokên şaredariyên AKP’ê qezenc kirin, van pêkanîn yek bi yek bi cih tînin. Piştî Serokê Şaredariya Bedlîsê Nesrûllah Tanglay lewheyên bi zimanê Kurdî, Tirk û Îngîlîzî ya “Hûn bi xêr hatin Bedlîsê” ya di ketina bajêr û Şaredariyê guhertin, vê carê jî Serokê Şaredariya Tetwanê yê AKP’î Mehmet Emîn Geylanî lewheya avahiya şaredariyê ya bi zimanê Kurdî rakir. Dûre jî Şaredariya Bajaroka Yolalan lewheya Kurdî guhert.
Hevserokê Komeleya Lêkolîna Çan û Ziman a Mezopotamya (MED-DER’ê) Mehmet Esen, derbarê van pêkanînên AKP’ê yên li Şarederiyan pêk tînin de axivî û got: “Hikûmeta AKP’ê ev 17 salin li dijî ziman û çanda Kurd polîtîkayan bi rêve dibe. Bi tayînkirina qeyûman, dest pê kê êrîşî nirxên gelê Kurd kirin. Saziyên weşanê yên radyo, televîzyon û rojnameyên ku ziman û çanda Kurdî pêş dixistin girtin.”
‘LEWHE SEDEMA HEBÛNA GELÊ KURD E’
Esen, diyar kir ku AKP bi şaredariyan pêkanînên xwe yên qeyûman dewam dike û wiha bilêv kir: “Bi rakirina lewheyan, wisan difikirin ku dê siyaseta HDP’ê tune bikin. Lewheyên Kurdî nirxên vê civakêne. Divê lewheyên hatin rakirin, tenê weke rakirina lewheyekê neyê dîtin, ev sedama hebûna gelê Kurd e. Ev civak bi zimanê xwe heye. Êrîşa lidijî lewhê, li dijî civakê ye. Ev polîtîkayên înkar û îmhayêne. Bi van pêkanînan çand, ziman, civak û dîroka gelê Kurd tune dihesibînin.”
‘AKP DIXWAZE KURDÊ XWE AVA BIKE’’
Esen, da zanîn ku AKP dixwaze li gorî berjewendiyên polîtîkayên xwe, Kurdê xwe ava bike û wiha pê de çû: “AKP bêyî ku li daxwazên Kurdan mêze bike, daxwazên xwe bi cih tîne. Bi polîtîkayên hilbijartinê li Amedê gelê Kurd bi Kurdî silava kirin, hewldanên polîtîkayên qirêjin. Mînak li Makedonya 15 hezar Tirk hene û li wê derê derfetên wan ên perwerdeya Tirki hene. Lê li Tirkiyeyê bi mîlyonan Kurd hene. Ger AKP jidil be, wê demê dê li dibistanan ji bo perwerdeya zimanê zikmanî derfetan ava bike. Di dema hilbijartinê de Kurdan hembêz dikin û hewl didin bi du sê dirûşmeyan gelê Kurd bixapînin. Gelê Kurd êdî baweriya wan bi van polîtîkayên nayê.”
‘DI HEMÛ QADÊN JIYANÊ DE DIVÊ BI KURDÎ BÊ AXAFTIN’
Esen, dest nîşan kir ku divê gelê Kurd li dijî polîtîkayên AKP’ê helwest bigirin û wiha dawî li axaftina xwe anî: “Di hemû qadên jiyanê de, divê bi Kurdî bê axaftin. Ez bang li gelê Kurd dikim ku xwedî zimanê xwe derkeve.”
MA / Ozgur Paksoy