NAVENDA NÛÇEYAN - Li Hezex, Gebze û Edeneyê malbatên zarokên wan di çalakiya greva birçîbûnê û rojiya mirinê de ne, li hev kom bûn û ji bo piştgiriya zarokên xwe çalakî li dar xistin. Malbatan ji bo rakirina tecrîdê bang li Wezîrê Dadê kirin ku gavên şênber bavêje.
Çalakiyên malbatên ku zarokên wan ji bo rakirina tecrîda li ser Rêberê PKK'ê Abdullah Ocalan di greva birçîbû û rojiya mirinê de ne didomin. Di vê çarçoveyê de malbat û dayikên girtiyan ên li Şirnex, Edene û Kocaeliyê li hev kom bûn û li gel hemû zordestî û astengiya polisan jî bi laçikên xwe yên spî ji bo piştgiriya zarokên xwe çalakî li dar xistin. Malbatan di çalakiyên xwe de ji bo çareseriya tecrîdê bang li Wezîrê Dadê Abdulhamît Gul kirin û jê xwestin ku gavên şênber bavêje.
ŞIRNEX
Bi dehan malbatên çalakgerên greva birçîbûnê û rojiya mirinê yên Şirnex, Cizîr û Silopyayê li avahiya HDP'e ya navçeya Hezexê ya Şirnexê hatin gel hev û xwestin ji bo piştgiriya zarokên daxuyanî bidin çapameniyê. Parlamentera HDP'ê ya Şirnexê Nûran Îmîr û bi dehan rêveberên HDP û DBP'ê jî ji bo piştgiriya malbatan hatin avahiya HDP'ê. Piştî demekê derdor, têketin û derketin avahiya HDP'ê ji aliyê polisan ve bi TOMA û maşîneyên zirxî hat dorpêçkirin. Li gel ku bi polisan re hevdîtin hatin kirin jî bi hinceta ji bo 15 rojan biryara qedexeyê ya Walîtiya Şirnexê heye destûr nehat dayîn ku girse derkeve derve û daxuyanî bide çapameniyê.
'EM JI TE NATIRSIN'
Li ser vê yekê di hundirê avahiyê de daxuyanî hat dayîn. Dayiken laçik spî di daxuyaniyê de wêneyên zarokên xwe yên di grev û rojiya mirinê de bilind kirin. Daxuyaniyê parlamenter Îmîr da. Îmîr di destpêka axaftina xwe de şoreşgerên ku di meha gulanê de jiyaan xwe ji dest dane bi bîr anî û ji ber qedexeyê bi vê gotinê "Tu kes li ber helwesta te dê çok daynene. Kes ji te natirse" bertek nîşanî Waliyê Şirnexê da. Di berdewamê de jî Îmîr bal kişand ser çalakiya greva birçîbûnê û rojiya mirinê û ev tişt anî ziman: "Bi hezaran girtî li hemberî faşîzmê li ber xwe didin. Çalakgeran pêvajoyeke dîrokî da destpêkirin. Xwedîderketina li wan peywira me ye. Tu hêz nikare berxwedana me bişikîne." Îmîr got ku divê bêyî ku kes jiyana xwe ji dest bide bi awayekî aqilane tevgerandin çêbibe û ev bamg li Wezareta Dadê kir: "Gav pratîk bavêje." Daxuyanî bi bi dûrişmeya “Bijî berxwedana zindanan” zindanan bi dawî bû.
EDENE
Malbatên girtiyan ên li Edeneyê ji bo balê bikişînin ser tecrîdê û piştgiriyê bidin rojiya mirinê û greva birçîbûnê 9 roj in çalakiyan li dar dixin. Dayikên girtiyan îro jî li Parqa Îsmet Înonuyê kom bûn û li vir çalakiya rûnîştinê li dar xistin. Li gel dorpêça polîsan dayik bi israrî çalakiya xwe pêk anîn. Parlamenterên Partiya Demokratîk a Gelan (HDP) Dîlan Dîrayet Taşdemîr û Tulay Hatîmogullari, rêveberên HDP, HDK, TUAYDER'ê xwestin piştgiriyê bidin çalakiya dayikan lê ji hêla polîsan ve hatin astengkirin. Li gel astengiya polîsan jî rêveber û parlamenter ji parqê derneketin.
Dayika 80 salî Latîfe Aydin, bi gopalê xwe her tim tevlî çalakiyê dibe. Kurekî wê û nebiyek wê li girtîgehê di greva birçîbûnê de ne. Dayika Latîfe destnîşan kir ku li dijî mirinan daketiye qadan û wiha got: "Girtî gav bi gavê nezî mirinê dibin. Berpirsê mirinan jî Serokkomar û Wezareta Dadê ye. Divê guh bidin daxwaz û rondikên dayikan. Bila qêrîna dayikan bibihîzin." Dayika Necla Kocaman jî bang li hikûmetê kir û wiha axivî: "Edî dem pir kêm bûye. Bila ev zilm ji holê rabe. Divê hemû dayik piştgiriyê bidin dayikên girtiyan." Çalakiya dayikên girtiyan bi dirûşma "Bijî berxwedanan zindanan" bi dawî bû.
GEBZE
Malbatên çalakgerên greva birçîbûnê û rojiya mirinê îro cara 40’emîn xwestin biçin ber derê Girtîgeha Gebzeyê û çalakiya rûniştinê li dar bixin. Parlementerên HDP’ê Ayşe Surucu û Omer Farûk Gergerlîoglû jî tevlî çalakiya malbatan bûn. Polîsan zext li malbatan kir û destûr nedan ku malbat xwe bigihînin ber derê girtîgehê. Malbatan bertek nîşanê astengi,ya polisan da û diyar kirin ku dê polis çi jî bikin dê her roj bên vir û ji bo piştgiriyê bidin berxwedana zarokên xwe çalakî li dar bixin.