Tê plankirin ku li nav sînorên gundê Xwarik ê navçeya Gimgim a Mûşê projeya Santrala Enerjiya Jeotermalê ku dê bandorek neyînî li herî kêm 16 gundan bike, bê çêkirin. Projeya ku ji hêla IGNIS H2 Inc ya Amerîkî ve tê plankirin, gefê li çandinî û sewalvaniyê ku debara sereke ya herêmê ne, dixwe û her wiha dê navendên olî yên welatiyên Elewî tune bike. Bi hezaran kes di 24'ê Nîsanê de li Gimgim û 25'ê Nîsanê de li Kanîreşê beşdarî mîtîngên ekolojiyê yên li dijî projeyê bûn. Gelek rêxistinên ekolojiyê beşdarî mîtîngan bûn û berxwedana gel veguherî nobedariya konê li qada sondajê.

 

 

Çalakiya nobedê ya ku ji aliyê Meclisa Ciwanan a Platforma Ekolojiyê ya Gimgimê ve hatiye destpêkirin berdewam dike. Jinên ku beşdarî çalakiyê bûn li ser bandora projeyê ya li ser herêmê axivîn.

 

Endama Kooperatîfa Jinan a Bîra Gimgimê Eylem Karadûmanê diyar kir ku xelkê Gimgimê konê hatî danîn wekî "ev êdî mala me ye" bi nav dike û destnîşan kir ku divê her kes xwedî li îradeya berxwedanê derkeve. Eylem Karadûmanê got: "Em ê li dijî her hewldanek ji bo serdestkirina axên me bisekinin. Wekî ku hûn dizanin, hewa xirab e. Tewra di mîtînga mezin de jî, dema ku em li benda baranê bûn û meraq dikir ka em dikarin mirovan bikişînin, dîsa jî mirov hatin. Em dibînin ku gel careke din li ser soza xwe disekine. Ew xwezaya xwe diparêzin. Em van pirsgirêkan li her derê Tirkiyeyê dibînin, ji rojhilatê heta rojavayê, ji başûr heta Deryaya Reş. Em li her derê mirovên berxwedêr dibînin. Ez hêvî dikim ku ew vê berxwedanê bidomînin."  

 

JI ALMANYAYÊ HAT TEV LI ÇALAKIYÊ BÛ

 

Fatma Guneşerê ku roja ku ji Almanyayê hatiye tevlî çalakiya kon bûye, diyar kir ku proje tevahiya civakê eleqedar dike û got ku ji bilî gotina "Wêrankirina xwezayê rawestînin" tu çareyeke din li ber wan nîne. Fatma Guneşerö fikara xwe anî ziman ku bi projeyê re erdên wan ên pîroz dê werin talankirin û got: "Girseya me li bajarên Ewropayê jî heye. Em hewl didin ku dengê xwe li wir jî bidin bihîstin. Li Ewropayê komeleyên li dijî santralên jeotermalê hatine avakirin. Em bi wan re xebatê dimeşînin. Bertek çêbûye, lê divê berdewam bike. Ji bo ku em bigihîjin armanca xwe, divê em heman rêyê bimeşin."

 

Fatma Guneşerê bal kişand ser polîtîkayên koçberiyê yên ku bi awayên curbicur li Kurdistanê hatine ceribandin û got ku proje jî berdewamiya vê polîtîkaya koçberiyê ye. Fatma Guneşerê got: "Em hemû di Keştiya Nûh de ne. Divê ev keştî biçe. Divê em hemû bibin yek."

 

'EM Ê TÊKOŞÎNA XWE BIDOMÎNIN'

 

Naciye Başakê diyar kir ku li seranserê Tirkiyeyê santralên madenê û jeotermal hene û got ku ew tevî şert û mercên hewayê yên nebaş û hemû zehmetiyan jî ji bo parastina axa xwe li ser pêyan in. Naciye Başakê got: "Em ê têkoşîna xwe bidomînin."