NAVENDA NÛÇEYAN - Şandeyeke payelebilind ji Pakistanê ku di danûstandinên dîplomatîk de ji bo bidawîkirina şerê bi Îranê re roleke navbeynkariyê dilîze, gihîşt Tehranê.

 

Li gorî daxuyaniyek ji nûnertiya Pakistanê ya li Neteweyên Yekbûyî, di nav şandeya ku çûye Îranê de Serfermandarê Artêşa Pakistanê, General Asîm Munîr û Wezîrê Karên Hundir Mohsin Neqvî hene. Ajansa nûçeyan a dewletê ya Îranê IRIB ragihand ku şande ji bo gihandina peyamek ji DYA'yê û organîzekirina tûra duyemîn a danûstandinan di navbera aliyan de çûye Tehranê.

 

Tûra yekem a danûstandinan di navbera DYA û Îranê de ku di dawiya hefteyê de li Îslamabadê ya Pakistanê pêk hat, bi ser neket û tu lihevkirinek çênebû.

 

Di vê navberê de, Serokwezîrê Pakistanê Şehbaz Şerîf jî îro li Cîddeya Erebistana Siûdî ye ji bo danûstandinan da ku li ser pêşketinên herêmî nîqaş bike. Hikûmeta Pakistanê vê dawiyê hewldanên xwe yên ji bo bidawîkirina pevçûnê bi rêya dîplomasiyê hem bi Tehran û hem jî bi Washingtonê re zêde kiriye. Tê payîn ku Şerîf vê hefteyê serdana Tirkiyeyê jî bike.