AGIRÎ - Li Giyadînê welatiyên ku beşdarî pîrozbahiya ji nû ve vejînê bûn gotin "Divê hemû gelê me ji bo azadî û aştiyê bi hev re bixebite" û daxwaza xwe ya ji bo aştiyeke birûmet anîn ziman.

 

Piştî "Banga Aştî û Civaka Demokratîk" a Rêberê Gelê Kurd Abdullah Ocalan a di 27'ê Sibatê de, heyecaneke mezin li seranserê Tirkiye û Kurdistanê belav bû. Berxwedana dîrokî ya gelê Kurd ku 47 sal berê dest pê kir, ket qonaxeke din. Gelê Kurd, bi xwedîderketina li banga Abdullah Ocalan, di salvegera 47'emîn a damezrandina PKK'ê de herikîn kolanan. Gel, bi meş, daxuyanî û pîrozbahiyan salvegera berxwedana gelê Kurd pîroz kir û careke din pabendbûna xwe bi banga aştiyê re ragihand.

 

Beşdarên şahiya gel a li navçeya Giyadînê a Agiriyê hat lidarxistin, daxwaza xwe ya ji bo aştiyeke birûmet anîn ziman.

 

Mehmet Gumûş (49) got: "Şahiya me ji bo azadî û aştiyê ye." Gumûş diyar kir ku ew ji bo Rêberê Gelê Kurd li qadan in û got: "Îro ji nû ve vejîna gelê Kurd e. Me tu carî serê xwe netewandiye, me tu carî çok daneniye û em ê di pêşerojê de jî daneynin." Savaş Demîr (70) ku tevî temenê xwe yê mezin bi coş û heyecaneke mezin hat şahiyê got: "Em aştî û biratiyê dixwazin. Em yekîtiya gelê xwe dixwazin. Em aştiyeke ku kes zilmê nebine dixwazin. Bila gel bi ziman û nasnameya xwe hebe."

 

Aşye Sariyê (55) bi neviyê xwe yê di hembêza xwe de hat qadê, got ku ew ji bo azadiyê hatiye pîrozbahiyê. Ayşe Sariyê daxwaza xwe ya ji bo aştiyê anî ziman û bang kir: "Divê hemû gelê me ji bo azadî û aştiyê bi hev re bixebitin. Bila êdî ne dayikên Kurd û ne jî yên Tirk negirîn. Werin em aştiyeke birûmet pêk bînin."

 

Welatiyê bi navê Ahmet Îdaci (60) jî got: "Em naxwazin mirov bimirin. Werin em êdî rê nedin ku komkujî çêbibin. Berxwedana gelê Kurd berxwedaneke pîroz e. Ev berxwedan dê ji niha û pê ve bi rêbazên demokratîk berdewam bike. Îro rojeke pir girîng e. Salvegera berxwedana gelê me ye. Têkoşîna gelê me dê ji niha û pê ve bi awayekî cuda berdewam bike."