Tirb hilweşandin û ala tirk bi daran vekirin   

2020-05-25 11:21:40


	 

	ÊLIH - Eskeran li Gundê Şemsê yê Navçeya Heskifa Êlihê tirbek dîrokî hilweşandin û ala tirk pê dakirin.   

	 

	Eskeran li Gundê Şemsê yê Navçeya Heskifê ya Êlihê ewil goristan bi maşîneyên zirxî xera kirin. Eskeran piştî goristan xera kirin vê carê tirba dîrokî hilweşandin û ala tirk bi tirbê û darên li nava goristanê daliqandin. Eskeran hefteya borî goristan hilweşandibûn û zerar dabûn goristanê. Eskeran carek din Tirba Şêx Îbrahim ku ji aliyê gel ve wekî tirba pîroz tê zanîn xera kirin û ala tirk li ser wê daliqandin. Gundiyên ku beriya qedexeya derketina kolanan xwestin tirbê ziyaret bikin, diyar kirin ku dema çûn goristan û Tirba Şêx Îbrahim ziyaret kirin, dîtin ku tirb û goristan hatiye rûxandin û ala tirk bi tirbê û darên li nava goristanê hatiye daliqandin.   

	 

	'TU ÎZAHA VÊ YEKÊ TUNE' 

	 

	Hevserokê Şaxa MEBYA-DER'ê Ahmet Yaşar, diyar kir ku di roja arîfeya cejnê de jî gorên wan tehamul nakin û wiha got: “AKP xwe dîndar dide naskirin. Lê tehamula wê ji gorên Kurdan û kesên oldar û xwedî dîrok û çand re tune ye. Tu îzahata vê yekê tune ye. Ji ber kurd in êrîş dikin. Em wekî MEBYA-DER'ê vê êrîşê qebûl nakin û em ê serî li rê û rêbazên hiqûqî û zagonî bidin."