
Rojnameger Orûç peyam şand: Pêdiviya min bi piştevaniya we heye

2019-12-14 17:18:45


	&nbsp;

	NAVENDA NÛÇEYAN – Rojnameger Azîz Orûç ê 4 roj in li Bazîdê di binçavan de ye bi rêya parêzerên xwe peyam şand û got: “Ez wek rojnamegerek bi salane dixwazim bibim dengê gelan. Bi rojane di tecrîda girankirî ya Ermenîstan, Îran û Tirkiyê de têm ragirtin. Niha herî zêde pêdiviya min bi piştevaniya we heye.”

	&nbsp;

	Rojnameger Azîz Orûç di 11’ê kanûnê de li navçeya Bazîdê ya Agiriyê hat binçavkirin û 4 roj in li Miduriyeta Polîsan a Bazîdê tê ragirtin. Ji ber dozek di salên xwendekariyê de li Orûç hat vekirin ceza lê hat birîn û du sal berê neçar ma biçe Herêma Federe ya Kurdistanê. Orûç roja 11’ê kanûnê ji aliyê medya îqtîdarê ve wek “terorîst” hat ragihandin û li gel Hevserokê HDP’a Bazîdê Abdullah Ekelek û endamê Meclîsa Şaredariya Bazîdê yê berê Muhammet Îkram Muftuoglû ve hatibû binçavkirin.&nbsp;

	&nbsp;

	Ekelek û Muftuoglû duh ji aliyê dadgehê ve bi angaşta “Alîkariya rêxistinê kirine” hatibûn girtin.&nbsp;

	&nbsp;

	Orûç hêj li emniyetê di binçavan de tê ragirtin.&nbsp;

	&nbsp;

	Rêxistina HDP’ê ya Bazîdê îro têkildarî vê binçavkirinê daxuyanî dabû û eşkere kiribû rojnameger Orûç li sînorê Îranê terkî mirinê hatiye kirin.&nbsp;

	&nbsp;

	Piştî daxuyaniya HDP’a Bazîdê derket holê rojnameger Orûç ê ji sala 2017’an vir ve li Herêma Federe ya Kurdistanê dijî xwestiye bi ser Ermenîstanê ve derkeve Ewropayê û dema hewldaye biçe Ermenîstanê hatiye girtin.&nbsp;

	&nbsp;

	Li gorî agahiyên hatin bidestxistin; di sînorê Ermenîstanê de polîsan kontrola rê kiriye û Orûç hilnedane Ermenîstanê û tevî gotiye ew rojnamegere jî wî xistine odeyek û bi saetan lê dane. Pişt re Orûç radestî Îranê hatiye kirin. Orûç li Îranê jî 2 roj di hucreyek de hatiye ragirtin û îşkence lê hatiye kirin.&nbsp;

	&nbsp;

	Rayedarên Îranê li şûna Orûç radestî Tirkiyê bikin, wî diavêjin ber sînorê Îran û Tirkiyê û terkî mirinê dikin. Orûç li xeta sînor ji ber sermaye hatiye asta jiyana xwe ji dest bide û bi rêya telefonê li xizmên xwe geriyaye û banga alîkariyê kiriye. Piştî vê yekê jî hatiye binçavkirin.&nbsp;

	&nbsp;

	BIJÎŞKAN ORÛÇ DERMAN NEKIRIYE!

	&nbsp;

	Orûç ê 4 roj in li Miduriyeta Polîsan a Bazîdê tê ragirtin tevî îşkenceya lê hatiye kirin jî lê nayê dermankirin. Hevjîna Azîz Orûç ê bavê du zarokan e Hulya Orûç li ser hesabê xwe yê Twîtterê têkiladrî hevjînê xwe agahî parve kir û got hevjînê wê herçiqas birine Nexweşxaneya Dewletê ya Bazîdê jî lê bijîşkên li wir wezîfedar bûne nehatiye dermankirin.

	&nbsp;

	Hulya Orûç di Twîtterê de ev agahî parve kir:&nbsp;

	&nbsp;

	“Ji #AzizOruc agahî heye. Hevjînê min duh û îro birine #yasareryilmazdevlethastanesine ku kontrola tenduristiya wî bê kirin, lê bi hênceta nobet guheriye bijîşkan ew derman nekiriye. Ez ji jiyana hevjînê xwe bi guman im.&nbsp;

	&nbsp;

	Bijîşkên nexweşxaneya dewletê ya bazîdê (#yasareryilmazdevlethastanesi) ji her tiştek were serê hevjînê min berpirsiyar in û sûcdar in. Dema hûn mezûn dibin li ser kîjan hêza siyasî sond dixwin.”

	&nbsp;

	Piştî 3 rojan îro parêzer çû gel rojnameger Orûç û bi rêya parêzerê xwe ji raya giştî re peyam şand.&nbsp;

	&nbsp;

	ORÛÇ: PÊDIVIYA MIN BI PIŞTEVANIYA WE HEYE&nbsp;

	&nbsp;

	Orûç di peyama ku bang li raya giştî kir wiha got:&nbsp;

	&nbsp;

	“Ez wek rojnamegerek bi salane dixwazim bibim dengê gelan. Bi rojane di tecrîda girankirî ya Ermenîstan, Îran û Tirkiyê de têm ragirtin. Niha herî zêde pêdiviya min bi piştevaniya we heye. Bi hêviya em di rojên azad de hev bibînin…”

	&nbsp;