
Roja Kobanê û Rojava bi megafonê pîroz kirin 

2019-11-01 16:15:33


	AMED – HDP’ê li navçeyên navendî yên Amedê bi daxuyaniyên çapemeniyê rojên Kobanê û Rojava yên Cîhanê pîroz kir. Li navçeya Yenîşehîrê polîsan destûr neda daxuyaniyê, HDP’iyan jî megafona xwe di şibakê de derxistin û daxuyanî dan.&nbsp;

	Rêxistinên HDP’ê yên Rezan, Sûr û Peyasê yên Amedê bi boneya 1’ê Mijdarê Roja Kobanê ya Cîhanê li ber avahiyên xwe daxuyanî dan. Rêveberên HDP’ê û DBP’ê û gelek welatî beşdarî daxuyaniyan bûn.&nbsp;

	&nbsp;

	LI YENÎŞEHÎRÊ QEDEXE KIRIN&nbsp;

	&nbsp;

	Rêxistina HDP’ê ya Navçeya Yenîşehîrê ya Amedê jî xwest li ber avahiya xwe daxuyaniya çapemeniyê li dar bixin, lê polîsan bi hênceta biryara walîtiyê destûr nedan daxuyaniyê. Rêveberên HDP’ê û polîs demek nîqaş kirin. Lê encam jê derneket û polîsan bi mertalên xwe deriyê avahiya HDP’ê ji çûnehatê re girtin.&nbsp;

	&nbsp;

	‘ÎLHAMÊ DIDE’&nbsp;

	&nbsp;

	Li ser vê yekê HDP’yî li avahiya xwe megafona xwe di şibakê de derxistin û daxuyanî dan. HDP’iyan bi awayê welatiyên li ser Kolanê Ekîncîlerê bibihîzin daxuyanî dan. Hevserokê Rêxistina HDP’a Yenîşehîrê Selahattî Kaya daxuyanî da û diyar kir ku Rojava di demek kin de di nava tevlîheviya jeopolotîk a Rojhilata Navîn de cihek bêhempa girtiye û got: “Şoreşa Rojava ya bi pêşengiya jinan pêk hat serkêşiyê ji dinyayê re dike û bûye tevgerek cîhanî. Her wiha şoreşa Rojava îlhamê dide têkoşîna azadiya jinê ya li Tirkiyê jî.”&nbsp;

	&nbsp;

	'LI DIJÎ KURDAN TIFAQAN DIKIN’&nbsp;

	&nbsp;

	Kaya da zanîn ku Rojava bûye navenda demokrasiya xweîfadekirina bi awayek azad a gelan û wiha got: “Rojava di warê azadixwaziya jinê de bû mînaka modela demokrasiya cîhanê. Lê îktîdara AKP-MHP’ê nahêle di serî de kurd û hemû gelên li wir bibin xwedî statû. Ji bo vê yekê her cûre tifaqan pêk tîne û hevkariyê bi rêxistinên selefî re dike.”&nbsp;

	&nbsp;

	'HER DU ROJ PÎROZ BIN’&nbsp;

	&nbsp;

	Kaya anî ziman ku Tirkiye li şûna êrîşî Rojava dike divê di Meclîsê de li çareseriyê bigere û dixwaze li ser penaberan Rojava bike mijara bazariyê. Kaya diyar kir ku di 21’ê Mijdarê Roja Kobanê ya Cîhanê û 2’ê Mijdarê Roja Rojava ya Cîhanê li dijî zordestiyê di têkoşîna demokrasiyê de berxwedanek meşru birêve dibe û got: “Em bang li her kesê dibêjin edalet, demokrasî û aştiyê dikin ku têkoşîna demokrasiyê mezin bike. Roja Kobanê û Rojava ya Cîhanê li mirovahiyê pîroz be.”&nbsp;

	&nbsp;

	&nbsp;

	POLÎSAN NEHIŞT WELATÎ LI DAXUYANIYÊ JÎ GUHDAR BIKIN&nbsp;

	&nbsp;

	Di kêliya daxuyaniyê de bênavber dirûşmên “Bijî berxwedana Rojava" û "Bijî berxwedana Kobanê" hatin berzkirin. Welatiyên li ser peyarêyê li berzkirin û daxuyaniyê guhdar dikirin ji aliyê polîsan ve hatin dûrkirin.&nbsp;