
Li kujerên Alî Uygar pirsîn 

2019-06-29 15:32:25


	ÎZMÎR – Parêzvanên mafên mirovan li Îzmîrê li kujerên Alî Uygar ê di sala 1980’î de di binçavan de hat windakirin û pişt re cenazeyê wî li “Goristana bêkesan” veşartin pirsîn.&nbsp;

	Rêveber û endamên Şaxa Komeleya Mafên Mirovan (ÎHD) a Îzmîrê bi dirûşm “Bila Winda Bên Dîtin û Kujer Bên Darizandin” vê hefteyê jî li ber Sumerbanka Kevn a li navçeya Konaka Îzmîrê li dar xistin. Parêzvanên mafên mirovan di çalakiyê de pankarta “Winda diyar in, kujer li ku ne?” vekirin û li kujerên Alî Uygar ê di sala 1980’î de di binçavan de hat windakirin û pişt re cenazeyê wî li “Goristana bêkesan” hat dîtin pirsîn.&nbsp;

	&nbsp;

	28 KES WINDA BÛNE&nbsp;

	&nbsp;

	Rêveberê ÎHD’ê Caner Canli daxuyaniyê xwend. Canli bi bîr xist ku ji OHAL’a di sala 2016’an ve hat îlankirin şûn ve heta niha herî kêm 28 kes winda ne û ji bo Engîn Eroglu yê li Dersimê winda ye bê dîtin bang li rayedaran kir.&nbsp;

	&nbsp;

	‘DI GORISTANA BÊKESAN DE DIBÎNIN’&nbsp;

	&nbsp;

	Canli behsa kuştina Alî Uygar ê di sala 1980’î de di binçavan de hat windakirin û pişt re cenazeyê wî li “Goristana bêkesan” hat dîtin kir û got: “Di 1’ê tîrmeha 1998’î de Alî Uygar li gel Mîthat Nisan, Mahîr Keçecî û Ozckan Fedakar dema bi trênê rêwîtiyê dikin li Pozantiya Edeneyê tê binçavkirin û wan dibin emniyeta Edeneyê. Pişt re dibin emniyeta Mêrsînê. 9 roj agahî ji Uygar nayê girtin. Dayik Hatîce Uygar û du keçên xwe li gel nûçegihanê Rojnameya Demokrat Vahap Şehîtoglu diçin bi Midurê Şaxa Yekemîn Omer Guneş û alîkarê wî Hanefî Avci re hevdîtin dikin. Dayik diyar dike ku ji rewşa jiyana kurê xwe fikaran dike. Bersiva dayikê hişk didin û jê re dibêjin ku kurê wê reviyaye. Li ser vê bersiva hişt malbat bêhejmar serî li saziyên dewletê dide. Di encama lêgerîn û hewldanên malbatê de cenazeyê Uygur li goristana bêkesan tê dîtin. Bêyî ev dosye bê vekirin hat girtin.”&nbsp;

	&nbsp;