Ey xweşika şevê LEYL!

2019-05-14 09:19:39


	AMED - Çalakgerê greva birçîbûnê Mehmet Çelîk ku ji 1’ê Adarê ve li Girtîgeha Rihayê di grevê de ye, ji bo pêşenga greva birçîbûnê Leyla Guven helbestek nivîsand û ji malbata xwe re şand. 

	Çalakiya greva birçîbûnê ku ji bo rakirina tecrîda li ser Rêberê PKK’ê Abdullah Ocalan, bi pêşengiya Hevseroka KCD’ê û Parlamentera Colemêrgê Leyla Guven beriya şeş mehan dest pê kir û li girtîgehan veguherî rojiya mirinê, bi biryardarî didome. 

	 

	Li welat û derveyî welat bi sedan kes di vê berxwedanê de cih digirin û daxwaza rakirina tecrîda li ser Ocalan dikin. Girtiyên li zindanan ku li dora daxwaza Guven bûn xelek û bi rojiya mirinê berxwedan derbasî asteke din kirin, bi peyamên xwe hêz û reng didin berxwedanê.

	 

	Girtiyê bi navê Mehmet Çelîk ku ji 1’ê Adarê ve li Girtîgeha Rihayê di greva birçîbûnê de ye, ji bo pêşenga berxwadana greva birçîbûnê Leyla Guven bi ser navê “Xweşika Şevê Leyl” helbestek nivîsand û ji malbata xwe re şand. Çelîk, di helbesta xwe de qala pêvajoya berxwedana Guven dike û tesîra berxwedanê ya li ser xwe tîne ziman. 

	 

	Çelîk, cezayê muebatê lê hatiye birîn û 25 sal in girtî ye. Ji ber salên xwe yên dûr û dirêj ên girtîgehê dest bi nivîsandinê kiriye û weke Nivîskar û Helbestvan Mem Farqînî tê nasin. 

	 

	Helbesta çalakger Çelîk wiha ye;

	 

	XWEŞIKA ŞEVÊ LEYL!

	 

	Wek di nava bahoza çileyê de bim

	Qerisî xwîna min di rehên min de

	Dema ew navê te yê pîroz

	Ku ji du lehengan diyarî bû

	Ji aliyê dengek zîz olan da

	Di nav guhên min de

	Di şeva heştê mijdara

	Du hezar û hijdan de

	Wek bablîsokek bêwext destpêkiribe

	Di gerdûna kadizê de

	Serobino bû deryaya dilê min

	Ji bihîstina kelecana rêwîtiya te

	Dema ji nişka ve tu

	Wek bûka barana heft reng

	Xuya bûyî li esmana welatê min

	Ji kerba gulên erxuwanî

	Pelên xwe yên sor weşandin

	Li hember xweşikbûna ebrûyên te

	Elîf şerm kir ji xwe

	Ku ew destpêka hemû gotinana bû

	Ew esmana serbilind

	Bejna xwe tewand bû stûxwar

	Li hember dilnizmiya te

	Dema te lêborîna xwe dixwest

	Jibo ew qas dereng mayînê

	Zuhrereng kena te bû û diçirisî

	Di wan çavên te yên hingivîn de

	Ey xweşika şevê LEYL !...

	Li hember bişirîna te

	Roj di nav tarîtiyê de dima

	Şerhrezad di bim baskê te de

	Ji gotinek destanek wek

	Elîf leyle we leyle afirand

	Ez jî helbestvan im xwedê giravî

	Bi hevokan dilîzim bi roj û şev

	Bîst û çar saet

	Lê tu hevokên min tunin

	Jibo destana te binivîsim

	Ev sed û heftê û sê roj derbas bûn

	Di ser rabweriya te de

	Lê ez hêjî li hevokan digerim

	Wek gêja

	Min biborîne ey xoşewîsta xoşewîstan

	Dibe ku hevokên min têr nekiribin

	Jibo rastiya te bi cîhanê bidim nasîn

	Lê lêvên min hene dewsa wan 

	Û ji bo her roja ku derbas bûyî

	Ramûsanek datînim ser dilê te

	Û dibim yek ji wan şopdarên te

	Ku ev şêst roj in

	Ez jî ji bo serbilindî dimeşim

	Li pey te

	Wek heft hezar kesên din