
Hakî Turgay: Me hêj nû dest bi berxwedanê kiriye Şahidê Zîndana Amedê: Ji bo girtiyan her saet girîng e 

2019-03-26 09:45:12


	MÊRDÎN – Hakî Turgay ê 26 roj in li dijî tecrîdkirina Ocalan di greva birçîbûnê de ye got: “Me hêj nû dest bi berxwedanê kiriye.” Bavê Turgay, Arîf Turgay jî got: “Her saet pirr girîng e. Ji bo çareseriyê divê demildest bikevin tevgerê.”&nbsp;

	Girtî Hakî Turgay ji 1’ê Adarê ve li dijî tecrîdkirina Rêberê PKK’ê Abdullah Ocalan di greva birçîbûnê yê bêdawî û bêdorveger de ye. Turgay di 8’ê Adarê ji Girtîgeha Tîpa E ya Orduyê sewqî Girtîgeha Tîpa E ya Mêrdînê kirin. Turgay çalakiya xwe li Girtîgeha Mêrdînê beredewam dike.&nbsp;

	&nbsp;

	Turgay di 24’ê kanûna 2016’an de li Êlihê bi îdaya “Endamê rêxistinê ye” û “Li ser navê PKK’ê xebat kiriye” hat girtin. Der barê Turgay de 4 caran cezayê muebeta girankirî tê xwestin. Turgay herî dawî di 8’ê Adarê de derket pêşberî 3’yemîn Dadgeha Cezayê Giran a Mêrdînê. Turgay ji ber girtîgehê dest danîbû ser parastina wî parastina xwe nekir. Danişîna wî dê di 5’ê Nîsanê de bê dîtin. Hat zanîn kul i ser biryara girtiyên siyasî ku beriya niha bi demekê girtibûn dê Turgay di vê dîrokê de beşdarî danişînê.&nbsp;

	&nbsp;

	PIRSGIRÊKÊN WÎ TENDURISTIYÊ HENE&nbsp;

	&nbsp;

	Rêveberiya Girtîgeha Mêrdînê dixwaze bi îdaya “ewlehiya hepsê dixe talûkeyê” Turgay sewqî girtîgehek din bikin. Turgay beriya bê girtin ji ber kazaya trafîkê ku derbas kiribû birîndar bibû û ji ber wê birîndariyê bi pirsgirêkên tenduristiyê re rû bi rû ye. Turgay heta niha du caran ji çîma xwe emeliyat bûye û ji ber îltîhab girtiye divê carek din jî were emeliyat kirin. Hat zanîn ku emeliyata Turgay tê astengkirin.&nbsp;

	&nbsp;

	‘ME HÊJ NÛ DEST BI BERXWEDANÊ KIRIYE’&nbsp;

	&nbsp;

	Turgay ê bi parêzerê xwe re hevdîtin pêk anî banga hesasiyetê li raya giştî kir û xwest ku her kes deng bide çalakiya wan. Turgay diyar kir ku heta daxwaza girtiyan bicih were dê çalakiya xwe dewam bikin û vê peyamdê da: “Me hêj nû dest bi berxwedanê kiriye.”&nbsp;

	&nbsp;

	‘HER SAET PIR GIRÎNG E’&nbsp;

	&nbsp;

	Bavê Turgay, Arîf Turgay ku endamê Desteya Rêveberiya Komeleya Piştevanî û Lêklînê ya 78’an û Berdevkê Mêrdînê der barê çalakiya kurê xwe de axivî. Turgay ê ku di destpêka salên 1980’î de li Girtîgeha Amedê li Jimara 5’an şahidiyê kiriye banga xwedî derketina li çalakgerên gerêva birçîbûnê kir. Turgay da zanîn ku daxwaza çalakgerên greva birçîbûnê pirr zelal e û got: “Ev tecrîd ne însanî ye û ne jî qanûnî ye. Tirkiye bi vê tecrîdê makeqanûna xwe û qanûnên xwe ji holê radike. Mafê her girtiyek heye ku dikaribe bi malbat û parêzerên xwe re hevdîtinê pêk bîne. Mafê wan ê name û faksan heye. Girtî dixwazin ev pêk were. Divê demildest daxwaza wan pêk were. Her saet pirr girîng e. Ji bo çareseriyê divê demildest bikevin tevgerê.”

	&nbsp;

	MA / Ahmet Kanbal

	&nbsp;