ROJEVA 3'YÊ ÇILEYA 2019'AN

2019-01-03 09:00:59


	* Zarok û hevrêyên Dayika Aştiyê Meryem Ozcan, bi gotina wê bal kişandin ser jiyana wê ya di nav têkoşîn, şer, koçberî û sirgûniyê de derbas bûye: "Ez ê canê xwe bidim, lê bes bila ev xwîn nerije." 

	* Ayla Akat ku di heyeta ewil a Îmraliyê de cih girt, bilêv kir ku vîna Ocalan derxist holê ji ber ji aliyê dewletê ve wekî xetere tê dîtin tecrîd didome û got: "Li Tirkiyeyê ji bo avakirina demokrasiyê, divê ewilî di warê çareserkirina pirsgirêka kurd de gav bên avêtin." 

	 

	* Der barê Endamê Dîwana Hevserokatiya KCD'ê Hîlmî Aydogdû ku wexta li Midûriyeta Emniyeta Amedê di bin çavan de bû qeyrana dil derbas kir û ew rakirin nexweşxaneyê de, bi heman tawanbariyan cara dudoyan bi îdiaya "endamtiya rêxistinê" doz hat vekirin. Dozgeriyê xwest 15 sal ceza li Aydogdû bê birîn. 

	 

	* Welatiyên her roj heta dernegê şevê li hemberî JES'a tê xwestin li Kizilcakoyê bê çêkirin nobetê digirin gotin: "Ji bo em li pêşeroja xwe xwedî derkevin em ê heta dawiyê li ber xwe bidin. Heke bivê em ê canê xwe jî bidin, lê em ê axa xwe nedin." 

	 

	* Ji bo hilbijartina herêmî der barê bikaranîna dengên girtiyan hin sînor hatin danîn. Endama Komîsyona Girtîgehan a Şaxa ÎHD'a Stenbolê Hatîce Onaran, bal kişand ser vê yekê û got: "Tê gotin wê bi vî awayî herî kêm mafê bikaranîna dengan a 5 hezar girtiyî bê xespkirin." 

	 

	* Wezîrê Karên Hundir, bi armanca serkeftinên qeyûm bişopîne û têkiliyên Hevserokên BDP’î yên bi rêxistinê re derxe holê mufetişên taybet peywirdar kir. Lê Qeyûm Omer Cimşît ê ku der barê wî de nelirêtiya îhaleyan derket holê, ji ber tevî hemû derfetên cemaweriyê bi ser neket li şûna wî Omer Derecî erkdar kirin. 

	 

	* Hamdûllah Aydemîrê ku ji Girtîgeha Tîpa T a Bafrayê sewqî Amedê hat kirin, şevekê li Xarpêt hat sekinandin. Aydemîr bi rêya malbata xwe ragihand ku li Xarpêtê îşkence lê hatiye kirin. 

	 

	* Felek Akan ku di dikana xwe de nanê tenûrê çêdike û pê debara xwe dike got: "Divê jin li ser piya bisekinin, muhtacî kesî nebin." 

	 

	* Parlementerê HDP'ê yê Sêrtê Siddik Taş diyar kir ku gelek kesên li Midûriyeta Nifûsê ya Sêrtê qeydên wan nehatine çêkirin serî li wan dane û ew ê der barê qeydên li gor "fermanê" nehatine çêkirin serî li YSK'ê bidin. 

	 

	* Girtiyên li Girtîgeha Tîpa T a Jimare 2'yan a Bunyana Kayseriyê destnîşan kirin ku girtiyên nexweş nayên tedawîkirin û gotin: "Mirovan ber bi mirinê ve dişînin. Em ji bo hesasiyet û hestiyarê bang li hemû derdoran dikin." 

	 

	* Danişîna 6'emîn a doza 17 zarokên ku li navçeya Nisêbînê ya Mêrdînê di serdema qedexeya derketina kolanan a gulana 2016'an hatin girtin dê li Dadgeha Mêrdînê bê dîtin. (14.00)

	 

	* Platforma Em Dê Cînayetên Jinan Rawestînin (KCDP) bi tevlêbûna gelek jinên hunermend bi dirûşmeya "Ji bo jin bijîn" dê li Dika Kadikoyê konserê bidin. (20.00)