
HDP’a Wanê: 7 salin birîna erdhejê nehatiye kewandin

2018-10-23 15:20:47


	WAN – Hevserokê HDP’a Wanê Umît Dede di salvegera erdheja Wanê de daxuyanî da û got: “Bi ser karesata Wanê re 7 sal derbas bû lê hêj birîn nehatine kewandin.” TMMOB'ê jî got desthilatdarî polîtîkaya xwe rantê didomîne.&nbsp;

	Rêxistina HDP’ê ya Wanê têkildarî salvegera 7’emîn a erdehja Wanê ya di 23’ê Cotmeha 2011’an de pêk hat li avahiya xwe civîna çapemeniyê li dar xist. Parlamenterê HDP’ê yê Wanê Murat Sarisac, rêveberên partiyê û welatî beşdar bûn. Di civînê Hevserokê HDP’a Wanê Umît Dede daxuyanî da û erdheja meha cotmehê û mijdarê bibîr xist û got: “AKP li şûna ku birîna Wanê derman bike, rewşê veguherand firsatê û rewşa civakî serobin kir. Bi deh hezaran mirov ji ber erdhejê bi şertên zor re hevrû hişt. AKP hêza xwe ya dixwest nîşan bide hemû ranta siyasî bû.” &nbsp;

	&nbsp;

	‘PLANA ÎMARÊ PIRSGIRÊKAN KÛRTIR KIR’&nbsp;

	&nbsp;

	Dede bal kişand ser hewldanên Hevşaredarê Wanê Bekîr Kaya yên wê demê û wiha domand: “Birêz Bekîr Kaya ji bo gelê xwe têkoşiya. Tayyîn Erdogan ê wê demê Serokwezîr bû şaredarî û partiya me kir hedef. Dewletê gelê me bi bobelatek mezin re rû bi rû hişt. Hevşaredarê me Bekîr Kaya yê ku di bin konan de bi gel re rabû û rûnişt di wan rojan de wî girtin û avêtin girtîgehê. Halbukî piştî erdhejê hikumetê erka plana îmarê ya Şaredariya Wanê jê girt û li Enqereyê hat birêve birin. Planên îmarê yên li ser maseyê hatin çêkirin pirsgirêkên Wanê hin bêtir kûrtir kir.”&nbsp;

	&nbsp;

	‘BIRÎN NEHATINE KEWANDIN’&nbsp;

	&nbsp;

	Dede anî ziman ku alîkariya dihat kirin ji aliyê rayedarên hikumetê û dewletê yên wê demê ve paş ve dihat şandin û got: “Alîkariya dihat jî ne ji bo gelê Wanê ji bo ‘projeyên wan ên Mega’ hat xerckirin.” Dede destnîşan kir ku erdhejê jiyana civakî û aborî serobin kir û got: “Ji ber şertên giran ên erdhejê civak û esnafan demên giran derbas kirin. Wan û Erdîş ‘herêma karesatê’ nehatin îlankirin. Ji wê rojê heta îro di nav gerîneka krîza aborî ya giran de Wan nehatiye ser hişê xwe. Hêjayî gotinêye hêj birînên erdheja Wanê û Erdîşê nehatine kewandin.”&nbsp;

	&nbsp;

	TMMOB: DESTHILATDARÎ RANTA XWE DIDOMÎNE

	&nbsp;

	Li aliyê din odeyên girêdayî Yekîtiya Odeyên Avahîsaz û Endezyarên Tirkiyeyê (TMMOB) jî têkildarî erdehjê di saeta 13.41'an de ku erdhej pêk hat li ber Peykerê Erdhejê yê li taxa Akkopruyê daxuyaniya çapemeniyê da. Serokên odeyan û gellek kes beşdarî daxuyaniyê bûn. Li ser navê TMMOB'ê Serokê Şaxa Odeya Endezyarên Înşatê (ÎMO) a Wanê Îsmet Bîlmez daxuyanî da û diyar kir ku li gel 7 sal di ser erdheja Wanê re derbas bû jî lê hêj feraseta plansaziya desthilatdariyê ya li hember erdhejan neguheriye û got: "Desthilatdarî polîtîkaya xwe ya rantê didomîne. Çêkirina avahiyan a qaçax û bêkontrol kirin qanûn. Divê ku dest ji vê efûya îmarê bê berdan."&nbsp;

	&nbsp;

	&nbsp;