'Hê jî êriş li şînên Kurdan tên kirin'

2025-10-29 09:20:18


	AMED - Hevseroka MEBYA-DER'ê ya Êlihê Nezahat Toprak Hasanê bal kişand ser ku dewletê di vê pêvajoyê de ji avêtina gavan dûr ketiye û tevî vê pêvajoyê jî hin pêkanînên xwe didomîne û got: "Em hîn jî di rewşeke wiha de ne ku êriş li ser cenazeyên Kurdan hene û em hîn jî nikarin cenazeyên xwe wergirin."

	Pêvajoya Aştî û Civaka Demokratîk ku bi banga Rêberê Gelê Kurd Abdullah Ocalan dest pê kir, bi vekişîna hêzên Tevgera Kurd ji bo Herêmên Parastina Medyayê ket qonaxa xwe ya duyemîn. Her çend dewlet û desthilat di qonaxa yekem a pêvajoyê de gav navêjin jî, ne diyar e ka dê di qonaxa duyemîn de ji bo “hiqûqa veguhêz” sererastkirinên yasayî yên pêwîst bike an na. 

	 

	Gelo dewlet û desthilata ku di qonaxa yekem a pêvajoyê de astengiyên der barê "şîn û mafê definkirina miriyan" domandin, dê di qonaxa duyemîn de siyaseta xwe biguherînin yan na? Ev mijar hê ne diyar e.

	 

	Hevseroka Komeleya Alîkarî Piştevanî Yekitî û Çandê ya bi Malbatên Xizmên Xwe li Dergûşa Şaristaniyê Windakirin re (MEBYA-DER) ya Êlihê Nezahat Toprak Hasanê ku beşdarî merasîma şewitandina çekan a Koma Aştî û Civaka Demokratîk bû û li komîsyonê hat guhdarîkirin, diyar kir ku astengiyên li pêşiya sersaxî û definkirinê berdewam dikin. Nezahat Toprak Hasanê bal kişand ser têkiliya di navbera astengiyan û pêvajoyê de û ji dewlet û desthilatê xwest ku li gorî ciddiyeta pêvajoyê tevbigerin.

	 

	'EM GAVÊN JIDIL ÊN TEVGERÊ DIBÎNIN'

	 

	Nezahat Toprak Hasanê anî ziman ku di pêvajoya ku bi banga Rêberê Gelê Kurd Abdullah Ocalan dest pê kir Tevgera Azadiyê ya Kurd pir zelal tevgeriyaye û got: "Di 27'ê Sibatê de, me banga sedsalê li Stenbolê bihîst. Ji wê rojê heta îro, em dibînin ku tevger gavên pir samîmî diavêje, çi merasîma bêçekbûnê be, çi jî vekişîna hemû hêzên xwe yên çekdar ji Tirkiyeyê be ku tevgerê sê roj berê ragihandibû. Ev daxuyanî balkêş bû ku wê êdî navê PKK'ê neyê bikaranîn. Navenda tevgerê gotibû, 'Em hêzên xwe vedikişînin.' Bi rastî, di vê gavê de êdî tiştekî ku ev alî bike nemaye; ji bilî parastina aramiyê, gavên pratîkî tiştek nemaye."

	 

	'HÊ JÎ ÊRIŞ HENE''

	 

	Nezahat Toprak Hasanê diyar kir ku dewletê hîn jî gavên berbiçav neavêtine û got: "Ya li holê ev e ku dewlet hîn jî gavên berbiçav neavêtine. Belê, em dikarin bibêjin ku refaha welêt hinekî zêde bûye, em dikarin bibêjin ku pevçûn rawestiyane, lê gaveke berbiçav tune. Kurd hîn jî xwedî garantiyên destûrî nînin, an jî ez ê li ser navê MEBYA-DER’ê bibêjim; hîn jî êriş li ser taziyeyên me Kurdan tên kirin ku em hîn jî nikarin cenazeyên xwe wergirin. Em li welatekî dijîn ku em nizanin cenazeyên kê ne. An jî em li welatekî dijîn ku şewitandina înfazan hîn jî berdewam dikin."

	 

	Nezahat Toprak Hesenê destnîşan kir ku Abdullah Ocalan, sermuzakerê pêvajoyê, hîn jî di girtîgehê de ye û nebûna rêziknameyan der barê vê yekê de kêmasiyek e. Nezahat Toprak Hasanê bilêv kir ku divê şert û emrcên sermuzakerevanê pêvajoyê bê guherandin û got ku dewlet demildest divê gavên berbiçav bavêje. 

	 

	MA / Fethî Balaman - Melîk Varol