
Îranê girtiyekî kurd bi darve kir 

2025-10-05 11:58:23


	&nbsp;

	NAVENDA NÛÇEYAN - Rejîma Îranê girtiyê siyasî kurd Saman Mihemedî yê xelkê Sine bi darve kir.

	&nbsp;

	Girtin, îşkence û darvekirinên rejîma Îranê ya beramberî azadîxwaz, welatparêz û çalakvanên Kurd berdewamin. Tora Mafê Mirovan a Kurdistanê têkildarî darvekirina girtiyek siyasî yê kurd de agahiyan belav kir.

	&nbsp;

	Hate diyarkirin ku duh girtiyê siyasî yê Kurd Saman Mihemedî yê xelkê Sine ya Rojhilatê Kurdistanê, li girtîgeha Qizlihesar ya Kerecê bi şêweyek veşartî û bêyî dayîna mafê hevdîtina dawî ya li gel malbatê, hate bidarvekirin.

	&nbsp;

	Rêxistinê da zanîn ku girtiyê siyasî Saman Mihemedî bi tometa ‘çekdarbûn û endambûna komên dijberiya Îranê’ hatiye darvekirin.

	&nbsp;

	Saman Mihemedî Xeyarî yê 35 salî di sala 2013’an de ji aliyê hêzên Wezareta Îtlaatê ya Îranê ve bêyî fermana dadwer hate binçavkirin û zêdetirî 4 salan li girtîgeha Evîn a Tehranê di hucreya yek kesî de hate girtin û ji bo îtîrafa bi zorê rastî êşkenceyek tund a fîzîkî û derûnî hat.

	&nbsp;

	Piştre ji aliyê şaxa 15’an a Dadgeha Şoreşê ya Îslamî ya Tehranê ve bi serokatiya Dadwer Selewatî bi tometa ‘çekdarbûn û endamtiya komên dijî Îranê’ bi cezayê darvekirinê hate mehkûmkirin.

	&nbsp;

	&nbsp;