
Bi biryara nûkirina hilbijartinên Curnê Reş, qeyûm tayînî şaredariyê kirin

2024-04-10 09:24:08


	RIHA - Li Şaredariya Curnê Reş a ku dê hilbijartinê lê bên nûkirin Qeymeqamê Curnê Reş Orhan Gazî Karataş wek qeyûm hate tayînkirin.&nbsp;

	Di hilbijartinên herêmî yên 31’ê adarê de Partiya Wekhevî û Demokrasiyê ya Gelan (DEM Partî) Şaredariya Curnê reş bi dest xist. Li gel biryara nûkirina hilbijartinê, qeyûm tayînî şaredariyê hate kirin. Xizmên namzetê AKP’î û peywirdarên sindoqan şeva hilbijartinê agir berdan sindoqên dengan û piştre jî ji Lijneya Hilbijartinê ya Navçeyê re îtîraz kirin. Lijne îtîraza AKP’iyan qebûl kir û biryara nûkirina hilbijartinê da. Hilbijartinê dê di 2’yê hezîranê de werin nûkirin.&nbsp;

	&nbsp;

	Qeymeqamê bi Curnê Reş Orhan Gazî Karataş bi erêkirina Walîtiya Rihayê wek Wekîlê Şaredarê Curnê Reş hate tayînkirin. Li gorî daxuyaniya Qeymeqamtiya Curnê Reş, Karataş dê li gorî madeya 46.’emîn a Qanûna Şaredariyan a Hejmar 5393’yan heya hilbijartinên 2’yê hezîranê dê li navçeyê Wekîltiya Şaredarê Curnê Reş bike. Piştî biryarê Qeymeqamtiya Curnê Reş bi daxuyaniyeke fermî raya giştî agahdar kir.&nbsp;

	&nbsp;

	DAXUYANIYA WALÎTIYÊ

	&nbsp;

	Di daxuyaniya peywirdarkirina Karataş de wiha hat gotin: “Qeymeqamê me yê Curnê Reş Orhan Gazî Karataş heya di 2’yê hezîrana 2024’an de hilbijartinê tên nûkirin û şaredarê navçeyê tê hilbijartin, li gorî madeya 46’emîn a Qanûna Şaredariyan a Hejmar 5393’yan wek Wekîlê Şaredariya Curnê Reş hatiye peywirdarkirin.”&nbsp;

	&nbsp;