
Di doza Sakîne Kultur de dozger ji bo faîl cezayê muebbeta giran xwest 

2023-12-05 13:21:38


	&nbsp;

	ŞIRNEX - Di doza Sakîne Kultur de dozger ji ber sûcê “Bi plankirî û ezyetê kuştiye” xwest cezayê muebbeta giran li Serokê Ocakên Tevgera Taybet a Şirnexê yê Şirnexê Îbrahîm Barkin were birîn.&nbsp;

	&nbsp;

	Jina bi navê Sakîne Kultur di 13’ê gulana sala 2022’yan de ji hêla Serokê Ocakên Tevgera Taybet a Şirnexê Îbrahîm Barkin ve bi îşkenceyê hate qetilkirin. Bi sûcê “Bi plankirî û ezyetê kuştiye” li Barkin doz hatibû vekirin. 6’emîn danişîna dozê li 2’yemîn Dadgeha Cezayên Giran a Cizîrê hate lidarxistin. Bersûc Îbrahîm Barkin &nbsp;ji girtîgeha lê tê ragirtin bi Pergala Deng û Dîmen (SEGBÎS) tev li danişînê bû. Her wiha Navenda Jinan a Dayika Taybet a Silopiyayê, parêzerê Wezareta Malbat û Xizmetên Civakî û parêzera Baroya Amedê Oyku Çakmak Osal jî di danişînê de amade bûn.&nbsp;

	&nbsp;

	EWRAQÊN KÊM

	&nbsp;

	Danişîna dozê bi tespîtkirina nasnameyan dest pê kir. Piştre jî parêzer Oyku Çakmak Osal mafê axaftinê girt. Osal, diyar kir ku daxwaza wan a ji bo temamkirina ewraqên kêm ji hêla şandeya dadgehê ve nehatiye qebûlkirin û ev tişt anî ziman: “Şandeya dadgehê her tim got ku dê daxwazên we bên nirxandin. Dê bandoreke mezin a van ewraqan li ser dosyayê çêbibe. Em dixwazin ku xisûsên dozgeriyê kêm hiştine ji hêla we ve bên nirxandin. Em dibêjin ku bersûc peywir û hêza xwe ji bo xapandina mexdûrê bi kar aniye û suîstîmal kiriye.”

	&nbsp;

	‘GUMAN HEYE KU FAÎLÊN DIN JÎ HEBIN’

	&nbsp;

	Osal, destnîşan kir ku şandeya dadgehê biisrar naxwaze kêmasiyên di dosyayê de neyên temamkirin û wiha pê de çû: “Pozîsyona bersûc gumanan zêde dike ku faîlên din jî di nava bûyerê de hebin. Di dosyayê de jî ev guman heye. Dozgeriyê îfadeyên van kesan negirt û vê yekê gumanên heyî zêdetir kir. Gelek telefonên aydê şexsî hatine tespîtkirin û em dixwazin ev jî bên nirxandin.”&nbsp;

	&nbsp;

	Piştre jî parêzerê Wezareta Malbat û Xizmetên Civakî axivî û xwest rewşa girtî ya bersûc bidome.&nbsp;

	&nbsp;

	DAXWAZA CEZAYÊ MUEBBETA GIRAN&nbsp;

	&nbsp;

	Piştî parastinan, dozger mutalaaya xwe pêşkeşî dadgehê kir. Di mutalaayê de dozger bal kişand ser derbên kêrê yên di rapora otopsiyê de û diyar kir ku bi vê yekê xuya dibe ku bersûc bûyer plan kiriye û wisa pêk aniye. Dozger xwest ku ji ber sûcê “Bi plankirî û ezyetê kuştiye” cezayê muebbeta giran li bersûc were birîn. Her wiha dozger xwest ku cezayê bersûc neyê kêmkirin.&nbsp;

	&nbsp;

	Bersûc Barkin û parêzerên wî jî ji bo li dijî mutalaayê parastinê bikin dem xwestin.&nbsp;

	&nbsp;

	DANIŞÎN HATE TALOQKIRIN

	&nbsp;

	Ji ber ku nekarîn xwe bigihînin kurê Sakîne Kultur, dadgeh ji daxwaza guhdarîkirina wî lêve bû û ji bo parastina li dijî mutalaayê danişîn taloqî 30’ê çileyê kir.&nbsp;