Rapora binpêkirina mafan a girtîgehên Marmarayê hat aşkerakirin 

2020-08-08 13:09:28


	STENBOL – MATÛHAY DER’ê rapora binpêkirinên mafan ên li girtîgehên herêma Marmarayê aşkera kir û destnîşan kir ku bi hinceta vîrûsa koronayê gelek mafên girtiyan tên binpêkirin. 

	 

	Komeleya Piştevaniya Malbatên Girtî û Hikumxwarin a Marmarayê (MATÛHAY DER), rapora girtîgehên herêma Marmarayê aşkera kir. Di raporê de hat destnîşankirin ku binpêkirinên li girtîgehan zêde bûne û hat gotin ku bi hinceta vîrûsa koronayê li gelek girtîgehan hevdîtinên vekirî nayên kirin, rojname û kovar nayên dayîn, mafê tenduristiyê tê astengkirin, derketina qadên hevpar hatiye qedexekirin.

	 

	DESTÛR NADIN ÇALIKIYAN 

	 

	Bi berdewama raporê de hat diyarkirin ku destûr ji çalakiyên mîna aktîvîteyên civakî, werzîş, sohbetê re nayê dayîn û di çûyîna girtiyan a nexweşxaneyan de pirsgirêk tên derxistin û ev tişt hat gotin: “Dema serdegirtinên kogûşan de pirtûkên tên desteserkirin nayên dayîn. Rojnameya Yenî Yaşamê nayê dayîn. Bi hinceta koronayê tecrîd li girtiyan tê ferzkirin. Girtiyên nexweş hê jî zehmetiyên micid dijîn. Nameyên kurdî nadin girtiyan.”

	 

	 PIŞTÎ 2 MEHAN BERSIV DIDIN

	 

	Di dawiya raporê de hat destnîşankirin ku bi awayekî têrker xwarinê nadin girtiyan û ev agahî hatin parvekirin: “Hin girtiyan ji bo êşa diranên xwe daxwaza derketina revîrê kirine, şê piştî 2 mehan bersiva daxwaza wan dane. Di danûstandina qantînê de bihayê tiştan gelek zêde kirine. Amûrên paqijî û xurekê bi sînor in tên dayîn.”