
'Em ê li dijî îşkenceyê îsyana xwe mezin bikin’  

2020-07-09 09:24:46


	WAN – Jinên Wanê diyar kirin ku îşkence û girtina aktîvîsta TJA’yê Rojbîn Çetîn hatiye kirin li dijî her kesî pêk hatiye û ew ê li dijî îşkenceyê û girtinan rêxistinbûyîna xwe mezin bikin.&nbsp;

	Aktîvîsta Tevgera Jinên Azad (TJA) û endama Desteya Rêveveberiya Xwecihî ya Demokrtîk a HDP’ê Sevîl Rojbîn Çetîn di 26’ê hezîranê de li Amedê di serdegirtina malê de bi îşkencekirinê hatibû binçavkirin. Nerazîbûna li dijî Çetîn di raya giştî de deng vedabû û hêj ev nerazîbûn didome. Ji ber lêpirsînek li Mêrdînê derbarê Çetîn de hatiye destpêkirin wê birin emniyeta Mêrdînê û piştî 12 rojan ew birin edliyê û ji aliyê dadger ve hat girtin. Jinên siyasetmedar ên li Wanê bertek nîşanî îşkencekirin û girtina Çetîn dan.

	&nbsp;

	'ÎŞKENCEYÊ ÎSYANA ME ZÊDETIR KIR’&nbsp;

	&nbsp;

	Hevşaredara Navçeya Serayê Caziye Dûman a ku qeyûm tayînî şûna wê hatibû kirin diyar kir ku divê jin li dijî îşkencekirina li Çetîn hat kirin bêdeng nemînin û got: “Îşkenceya li Çetîn hat kirin li hemû jinan hatiye kirin. Ev îqtîdar dixwaze bi tundiyê jinan bêdeng bike. Lê wê jin bêdeng nebin. Tenê ne li Wan, Colemêrg û Amedê jin li ser pêya ne li her devera dinyayê jin li ser pêya ne û li dijî vê îşkenceyê îsyana me heye. Em li cem Rojbîn Çetîn in. Hevala me Rojbîn a bêhiqûqî hat girtin bila demildest were berdan.”&nbsp;

	&nbsp;

	‘DIVÊ EM HIN BÊTIR XWE BI RÊXISTIN BIKIN’&nbsp;

	&nbsp;

	Hevseroka Rêxistina HDP’ê ya Navçeya Artemêtanê Şukran Şen jî da zanîn ku îşkenceya li Çetîn hatiye kirin li hemû jinan hatiye kirin û got: “Min her birîn û her êşa hevala me Rojbîn wek êş û birînên xwe dît. Heke ev tişt tên serê hevşaredara me ya Artemêtanê ya berê Rojbîn ji ber kêmasiya me hemûyan e û têkoşîna me nehatiye astek ku têr dike. Tişta ku em ji niha şûn ve bikin; divê em hin bêtir rêxistinbûyîna jinan ava bikin. Divê em jin li dijî rewşên wiha gavên bi hêz biavêjin.”&nbsp;

	&nbsp;

	‘ÎŞKENCE HAT REWAKIRIN’&nbsp;

	&nbsp;

	Endama Meclîsa Şaredariya Artemêtanê Elîf Yigît jî anî ziman ku polîtîkaya îqtîdarê ya li dijî jinan xwe di şexsê Rojbîn Çetîn de derxistiye holê û got: “Rojbîn Çetîn dema hevşaredara Artemêtanê bû bi awayekî neheqî qeyûm tayînî şûna wê hatibû kirin û îrade hatibû desteserkirin. Niha jî bi îşkence û girtinê dixwazin azadiya wê ji destê wê tê girtin. Walîtiya Amedê îşkenceyê parast û adeta rewa dît. Şert û merc çi dibin bila bibin heta dawiyê em ê li dijî vê zihniyeta jinan tune dihesibîne têbikoşin.”&nbsp;

	&nbsp;