Mîhrîcana Fîlmên Kurd a Amsterdamê dest pê dike

2022-05-03 13:46:29


	 

	ENQERE - Mîhrîcana Fîlmên Kurd a Amsterdamê (AKFF) ku par ji ber pandemiyê online hatibû kirin, îsal dê di 13-15’ê gulanê de were lidarxistin. Mîhrîcan dê 3 rojan berdewam bike û gelek fîlmên xelat wergirtin jî dê di mîhrîcanê de bên pêşandan. 

	 

	Mîhrîcana Fîlmên Kurd a Amsterdamê (AKFF) ku her sal di meha gulanê de tê lidarxistin dê îsal di navbera 13-14-15’ê gulanê de bê lidarxistin. Par ji ber pandemiyê mîhrîcan online hatibû kirin. Di mîhrîcana îsal de dê fîlmên metraja wan dirêj, belgefîlm, anîmasyon û kurtefîlm bên peşandan. Mîhrîcan dê di 13’ê gulanê de bi fîlmê “Cîran” ê derhênerê kurd ê Swîsreyî Mano Khalil dest pê bike. 

	 

	Ji hevkarên damezirîner ên mîhrîcanê û organîzatorê Hollandî Reber Dosky dê bi fîlmê “Sidik û Panter” ê bi metraja dirêj ku di 8’emîn Mîhrîcana Fîlman a Navneteweyî ya Duhokê de xelat wergirtibû beşdarî mîhrîcanê bibe. AKFF’ê di malpera xwe de diyar kir ku mebesta wan ew e ku ji fîlman heta belgefîlman, ji anîmasyonan heta produksiyonên medyayê yên nûjenîxwaz, gelek derdorên cuda di sînemeya kurdî de bicih bikin. 

	 

	Bernameya mîhrîcanê wiha ye:

	 

	13’ê Gulanê

	 

	Mano Khalîl- Cîran

	 

	14’ê Gulanê

	 

	Arsalan Amîrî - Zalava

	 

	Mîraz Bezar - Before Your Eyes (Li Ber Çavên Te)

	 

	Shawkat Amîn Korkî- The Exam (Ezmûn)

	 

	Ferît Karahan – Traşa Dibistanê

	 

	Hîner Saleem - My Sweet Pepper Land

	 

	Şêro Hindê - Love in the Face of Genocide (Li Qeraxê Qirkirinê Evîn)

	 

	Elîf Yîgît - Heskîf

	 

	Haşîm Aydemîr – Dema Dirîreşkan (Blackberry Season)

	 

	Antonia Kilian - The other side of the river (Aliyê Din ê Çem)

	 

	Apo Bazidî - Resistance is life (Berxwedan jiyane)

	 

	15’ê Gulanê

	 

	Soleen Yusef- House without Roof (Mala Bêban)

	 

	Hogir Hirorî- Sabaya

	 

	Dirk Schäfer- The Bachelor House (Mala Ezeban)

	 

	Yilmaz Guney – Yol (Rê) 

	 

	Kazim Oz - Zer

	 

	Îbrahîm Selman – Nameyek bo Bavê Min (Brief aan mijn Papa)